FAROVON MFYDA YoShLARNI MAʼNAVIY-MAʼRIFIY JIHATDAN TARBIYaLAShGA OID TADBIR BOʻLIB OʻTDI

Bugungi yoshlar – tom maʼnoda ona Vatan taraqqiyotiga, kelajagiga daxldor avlod hisoblanadi. Ularning har tomonlama yetuk va bilimdon, tashabbuskor, el-yurt manfaati yoʻlida fidoyi insonlar boʻlib voyaga yetishi xalqimizning ertangi tinch va farovon hayotining chinakam kafolatidir.

Shu bois, yoshlar tarbiyasi bilan bogʻliq muammolarni ijobiy hal etish, ularning tashabbus va intilishlarini qoʻllab-quvvatlash, oʻzlarini qiziqtirgan yoʻnalishlar boʻyicha oʻqish, tadbirkorlik bilan shugʻullanishga boʻlgan istaklarini ragʻbatlantirishga qaratilgan saʼy-harakatlar mamlakatimiz ijtimoiy-iqtisodiy siyosatining ustuvor maqsadidir. Bu borada Amudaryo televideniyesining ijodiy jamoasi tomonidan amalga oshirilayotgan “Yuksak maʼnaviyatli va axloqli yoshlar – kelajak poydevori” loyihasi doirasidagi tadbirlar oʻzining mazmun-mohiyati bilan muhim ahamiyat kasb etmoqda.

“Jaholatga qarshi – maʼrifat” tamoyili asosida ijtimoiy-maʼnaviy muhitni sogʻlomlashtirishda ijtimoiy sheriklikni kuchaytirish maqsadida Oʻzbekiston Respublikasi Oliy Majlisi huzuridagi NNTlar va fuqarolik jamiyatining boshqa institutlarini qoʻllab-quvvatlash jamoat fondi tomonidan moliyalashtirilgan mazkur loyihaga koʻra, tumanimizdagi ovul va mahallalarda, taʼlim-tarbiya muassasalarida oʻtkazilayotgan davra suhbatlari va uchrashuvlarda aholi qatlamlarining barcha vakillari qamrab olinmoqda.

Ana shunday maʼnaviy-maʼrifiy tadbirlardan biri joriy yilning 15-iyun sanasida Farovon mahalla fuqarolar yigʻinida ham boʻlib oʻtdi. Tadbirda Farovon MFY faollari, ota-onalar va yoshlar ishtirok etishdi.

Tadbirni Farovon MFY raisi Madamin Kazakov ochdi va yoshlar maʼnaviyatini yuksaltirish, ular ongida Vatanga muhabbat, milliy va umuminsoniy qadriyatlarga sadoqat ruhini shakllantirish maqsadida mahallada amalga oshirilayotgan ishlar xususida soʻz yuritib, yoshlarning boʻsh vaqtlarini mazmunli oʻtkazish, ularni mafkura maydonining turli xurujlaridan himoya qilish, maʼnaviy dunyosini boyitishda mahalla bilan taʼlim muassasalarining hamkorligi muhim ahamiyatga ega ekanligini taʼkidladi.

Haqiqatan ham Farovon MFYda maʼnaviy-maʼrifiy tarbiyaviy ishlar yaxshi yoʻlga qoʻyilgani bois, 642 ta xonadonga birikkan 710 ta oilaning barchasi tinch-totuv hayot kechirishmoqda.

Mahallaning jami aholisi 2521 nafardan ziyod boʻlib shundan 1261 nafari ayol-qizlardir. Aholining asosiy qismini yoshlar tashkil etadi. Yaʼni, 7-13 yoshli oʻsmirlar 317 nafar, 14-17 yoshli oʻsmirlar esa 288 nafardan ziyod, 18-30 yoshlilar 553 nafar boʻlib, milliy tarkibiga koʻra, 2269 nafar aholi oʻzbek, 96 nafari qozoq, 121 nafari qoraqalpoq, 2 nafar rus va 33 nafar boshqa millat vakillaridan iborat.

Quvonchlisi shundaki, mahallada barcha millat vakillari ahil-inoqlikda yashab, mehnat qilishadi. Yoshlarning boʻsh vaqtlarini mazmunli oʻtkazish, ularning alohida iqtidorlarini yuzaga chiqarishda yetakchi – MFY raisi – hokim yordamchisi – xotin-qizlar faoli hamkorligi muhim ahamiyat kasb etmoqda. Ayniqsa, fuqarolar yigʻini komissiyalari va jamoatchilik tuzilmalari hamda MFY raisi rahbarligidagi 11 kishidan iborat yigʻin Kengashi aʼzolarining oʻzaro hamkorlikdagi saʼy-harakatlari tufayli mahalla yoshlari orasida sababsiz dars qoldirish, huquqbuzarlik holatlari, shuningdek, oilaviy kkelishmovchiliklar deyarli yoʻq hisobi.

Oʻsib kelayotgan yosh avlodni turli mafkuraviy xurujlar, diniy ekstremizm, missionerlik targʻibotlaridan himoyalashga qaratilgan “Oʻz uyingni oʻzing asra,” “Xavfsiz tun”, “Tigʻ” kabi nazorat tadbirlari tez-tez oʻtkazilayotgani oʻzining ijobiy samarasini bermoqda.

Aholi bandligini taʼminlashga qaratilgan tadbirlar tufayli, garchi shahar sharoitida yashasalar-da 420 ta oila oʻz tomorqa yeriga ega, 6 ta oila esa tomorqa xoʻjaligida issiqxona faoliyatini yoʻlga qoʻygan.

Ayni paytda mahalla hududidagi 420 ta xonadon oʻz tomorqa yeriga ega ekanligini hisobga olsak, ushbu xonadonlarda voya yetayotgan yoshlar uchun bu haqiqiy tabiat bagʻridagi gashtli mehnat lahzalarini inʼom etadi.

Tadbir davomida “Yuksak maʼnaviyatli va axloqli yoshlar – kelajak poydevori” grant-loyihasi koordinatori, “Taraqqiyot koʻzgusi” va “Mening oilam” gazetalarining maxsus muxbiri Robiya Yoʻldosheva loyihaning maqsadi va undan kutilayotgan natijalar haqida batafsil toʻxtalib oʻtdi va bugungi davr talablari, yoshlarning boʻsh vaqtlarini mazmunli oʻtkazish, yozgi taʼtil paytida ularni turli xil toʻgaraklarga jalb etish, koʻchalararo sport musobaqalarini tashkil etish xususida ish yuritish boʻyicha oʻz tavsiyalarini berdi.

Tadbir davomida Farovon MFY yoshlar yetakchisi Shohruh Roʻzmetov, mahalladagi hokim yordamchisi Muqaddas Beknazarova, mahalla faollaridan Baxtiyor Poʻlatovlar yoshlar tarbiyasi bilan bogʻliq oʻz fikr-mulohazalarini bildirdilar. Shuningdek, tadbir ishtirokchilari yoshlarni yozgi taʼtil paytida nazoratsiz qoldirmaslik, ularning qimmatbaho mobil aloqa vositalaridan foydalanishlarini nazorat qilish, eng avvalo ota-onaning vazifasi ekanligini alohida qayd etishdi.

Ravshan BAHROMOV, Muyassar XALILLAYeVA.