TAShABBUSLI BYuDJET – MUAMMOLARNI HAL QILIShNING XALQChIL VOSITASI

Prezidentimizning 2018-yilda “Byudjet maʼlumotlarining ochiqligini va byudjet jarayonida fuqarolarning faol ishtirokini taʼminlash chora-tadbirlari toʻgʻrisida”gi  hamda  2021-yilda “Byudjet jarayonida fuqarolarning faol ishtirokini taʼminlash boʻyicha qoʻshimcha chora-tadbirlar toʻgʻrisida”gi  Qarorlari qabul qilingan.

Qarorga muvofiq 2022-2026-yillarga moʻljallangan Yangi Oʻzbekistonning taraqqiyot strategiyasini “Insonga eʼtibor va  sifatli taʼlim yili”da amalga oshirishga oid davlat dasturi doirasida byudjet mablagʻlarining bir qismini jamoatchilik fikri asosida yoʻnaltirish boʻyicha amalga oshirilayotgan ishlar izchil davom ettirilmoqda. Tashabbusli byudjetlashtirish jarayonlarida fuqarolarning faolligini oshirish hamda mamlakatimizda oʻtkazib kelinayotgan  ovoz berish  jarayonlarida faol ishtirok etib kelayotgan keng jamoatchilikni yanada ragʻbatlantirish, hududlardagi dolzarb muammolarni qisqa muddatlarda bartaraf etish maqsad qilingan.

Joriy yilgi Tashabbusli byudjetning ikkinchi mavsumida Amudaryo tumanining 2023-yil uchun tasdiqlangan xarajatlar smetasida jami 12 mlrd. 39 mln. 432 ming soʻm rejalashtirilgan.

Iqtisodiyot va Moliya vazirligi tomonidan ochilgan Ochiq byudjet (openbudjet.uz) portaliga 2023-yil 17-iyuldan 7-avgustga qadar boʻlgan davrda tuman fuqarolari tomonidan jami 116ta tashabbus kiritilgan. 2023-yil 26-avgustdagi ishchi guruh tomonidan oʻtkazilgan yigʻilishda ushbu tashabbuslar komissiya aʼzolari tomonidan loyiha qiymatlari qayta koʻrib chiqildi. Shundan  9ta tashabbus belgilangan tartibga zid ekanligi sababli rad etilgan hamda ushbu takliflar boʻyicha tashabbus bergan shaxsning shaxsiy kabinetiga rad qilinishining asoslangan sabablari toʻgʻrisida xabarnoma yuborilgan.

Tanlab olingan 107ta tashabbuslar maʼsullar tomonidan qayta hisob-kitoblar qilinib, jamoatchilik oʻrtasida yigirma kun davomida ovoz berish jarayoniga ruxsat berildi.  Mavjud loyihalar uchun ovoz berish jarayoni joriy yil 27-avgustdan 16-sentyabrga qadar etib belgilandi.

Ovoz berish yakuniga koʻra, jamgʻarmada shakllangan mablagʻ doirasida eng koʻp ovoz olgan 7ta tashabbus “gʻolib” deb topildi. Ushbu tashabbuslarning jami qiymati 9 mlrd. 240 mln. soʻmni tashkil qiladi.

Ovoz berish jarayonining ikkinchi mavsumida 80 ming 348 nafar fuqaro ishtirok etgan boʻlib, tumanimiz umumiy aholi soniga nisbatan  39 foizni tashkil qildi. Oʻtgan 2022-yil ikkinchi mavsumida 33 ming 276 nafar fuqaro ovoz berish jarayonida ishtirok etgan edi.

Tashabbusli byudjet joriy yildagi birinchi mavsumida tumanimizdagi Toʻlqin, Jumurtov, Jumur ovul, Xolimbeg, Tor yop, Kuyuk koʻpir, Choykoʻl, Navoiy nomli,  Qoramon, Boʻz solma, Qilichboy, Uyshin,  Daryo boʻyi, Qangli, Qum yop, Besh ovul, Tosh qalʼa, Oq oltin, Oʻzbekiston, Namuna, Bosuv kabi ovul va mahallalar fuqarolari oʻzlarini qiynab kelayotgan muammolarni hal etishda faol ishtirok etib, oʻz hududlarini ijtimoiy-iqtisodiy rivojlantirishga hissalarini qoʻshdi.

Prezidentimizning 2021-yil 13-apreldagi “Byudjet jarayonida fuqarolarning faol ishtirokini taʼminlash boʻyicha qoʻshimcha chora-tadbirlar toʻgʻrisida”gi qarori bilan amaldagi mexanizm yanada takomillashtirilib, oʻtgan yildan boshlab tuman va shahar byudjetlari xarajatlarining 5 foizi bevosita fuqarolar tomonidan bildirilgan tadbirlarga yoʻnaltirilishi belgilab qoʻyildi. Bundan tashqari, joylarda fuqarolarni qiynab kelayotgan muammolarni aynan ularning tashabbuslari asosida hal etish imkoniyatini yaratishga ajratilayotgan qoʻshimcha daromadlarning 10 foizlik miqdori 30 foizga koʻtarildi.

Mazkur jarayonlarda fuqarolarning faol ishtirok etishi – oʻz hududlaridagi mavjud dolzarb muammolarning bartaraf etilishida hamda byudjet mablagʻlarining toʻgʻri taqsimlanishida oʻz hissalarini qoʻshishlariga keng imkoniyatlar yaratadi.

Tuman hokimligi Axborot xizmati.