DUGONALAR, BORMISIZ, OMONMISIZ?!

Ayol – jamiyat tayanchi, koʻrki va ezgulik sari yoʻnaltirib turuvchi qudrat sohibasi. Ayol – u eng avvalo ona, oila bekasi, rafiqa, malakali mutaxassis, rahbar, ilm-fan fidoyisi. Koʻrdingizmi, bugungi zamonaviy Ayolning zimmasida qanchalik zalvorli yuk bor! U ana shu zalvorli yukni yelkasida tutibgina yashamaydi,balki har lahzada ayollik masʼuliyatini yurak-yuragidan his etib, faqat va faqat oldinga dadil intilib yashaydi. Dadillik unga kuch beradi, ezgu orzu-umidlar roʻyobi uchun doimiy faol harakatda boʻlishga undaydi.

Xoʻsh, bugungi davr ayolining hayotga qarashlari qanday? Uni qanday muammolar bezovta qilayotir? Yosh ayol-qizlarimizning ijtimoiy faolligini yanada oshirish borasida qanday muammolar bor?

Biz bugungi "Dugonalar, bormisiz, omonmisiz?!” deb nomlangan davra suhbatimiz ishtirokchilari bilan aynan yuqoridagi savollarga javob topishga harakat qildik.

Robiya YOʻLDOShEVA, jurnalist:

– Assalomu alaykum, avvalo tahririyatimizga xush kelibsizlar.

Suhbatimizni boshlashdan oldineʼtiboringizni bir fikrga qaratmoqchiman. Yaʼni, bugungi davr ayoli bilan kechagi kun ayoli oʻrtasidagi farq, ularning dunyoqarashi, jamiyatda oʻzini tutishi, shaxs sifatida shakllanishida jiddiy muammolar yuzaga kelayotganday...

Shirin YaNGIBOYeVA, Oʻzbekiston "Milliy tiklanish” demokratik partiyasi raisi oʻrinbosari, xalq deputatlari tuman Kengashi deputati:

– Fikringizga qoʻshilaman. Lekin barchaga, ayniqsa, jamiyatimizdagi faol ayollarga nisbatan bunday fikr bilan qarash notoʻgʻri boʻladi. Avvalo, kechagi kun ayoli biqiq bir sharoitda yashadi, ijod etib, mehnat qildi. Sobiq tuzumning qoliplashtirilgan siyosati taʼsirida qancha-qancha iqtidorli ayol-qizlarimiz tumanimiz markazi – Mangʻitdan nariga oʻtishgani yoʻq. XXI asr oʻzbek ayoli tamoman oʻzgardi: u ilm-fanda, sportda va sanʼatda, barcha sohalarda ilgarilab ketdi. Huquqiy ongi oʻsdi, dunyoqarashi kengaydi. Bu – ayolning shaxs sifatida shakllanishida muhim ahamiyat kasb etadi, albatta. Lekin ana shu shakllanish jarayonida siz aytmoqchi boʻlgan muammolar ham yuzaga kelganini yashira olmaymiz. Avvalo, kechagi kun ayoli bilan bugungi zamonaviy ayolning oʻzini tutishiga bir eʼtibor bering-a! Farq katta, toʻgʻrimi? Bu–ayniqsa ayollarimizning koʻcha-koʻyda, oilada oʻzini tutishlarida, kiyinish madaniyatida yaqqol seziladi. Eng yomoni, koʻpchilik ayollarimizning oʻzlaricha "zamonaviy” boʻlaman, deb "ommaviy madaniyat” ga ruju qoʻyayotganlari.

Gulasal MATYoQUBOVA, 10-sonli umumtaʼlim maktabi direktori, xalq deputatlari tuman Kengashi deputati:

– Men ham shuni aytmoqchi edim. Nazarimda nuroniy yoshga yetgan keksa onaxon va momo-buvilarimiz amal qilgan ayollik saltanatining barcha ayollar uchun oʻta muhim boʻlgan sabr-qanoat, mehr-oqibat, sharqona odob-ikromlilik tamoyillariga munosib fazilatlar koʻpchilik ayol-qizlarimiz uchun begona. Hayotiy misol, maktab rahbari sifatida oʻquvchilarning har xil jimjimador, qimmatbaho taqinchoqlarga berilib, moda ketidan quvishiga qarshi yuqori sinf oʻquvchi-qizlari bilan suhbatlar oʻtkazaman. Aynan mening suhbatimda ishtirok etgan, tanbeh eshitgan ayrim oʻquvchi-qizlarning onalari koʻpchilik hollarda qizlariga tanbeh berish oʻrniga mendan xafa boʻlishadi. Qizlari koʻcha-koʻyda ochiq-sochiq, beoʻxshov kiyinib, sochlarini yoyib yurishsa yaxshimi? Axir oʻsmir va balogʻot yoshidagi qizlarning tor shim kiyishi oqibatida tos suyak zararlanmaydimi? Buni zamonaviy tibbiyot ham tasdiqlab turibdi-ku! Doimiy ravishda tor shim, tor yubka kiygan qizlar ertaga turmush qurib, ona boʻlganlarida qanchalik qiynalishini bir oʻylab koʻrsalar yomonmi? "Ommaviy madaniyat”, deb bong uramiz. "Ommaviy madaniyat”ga intilish oqibatida koʻpchilik ayollarimiz oʻz qizlariga ibrat boʻlish oʻrniga ana shu toʻrga ongliravishda ilinib qolishayotir. Qarang, oʻzim koʻp bora guvoh boʻlgan holat: koʻchaning u yuzi bilan bu yuzida ketayotgan ikki nafar yoshgina kelinchak bir-biri bilan soʻrashyapti:

– Ayva, Dili, kak delo?

– Ayva, zoʻr. Davay, Zulfi, nochda kel, podrujkalarim kelishadi.

Soʻng ikkalasi bir-biriga qoʻllarini labiga tekkizib, gʻoyibona "oʻpich” yuborishadi.

Ana xolos, deyman. Bu qanday soʻrashish, bu qanday muomala-munosabat?

Kechagi ayol shunday qilarmidi? Yoʻq, albatta: oʻzbek ayoliga xos salomlashish odobi, ibo va hayo mujassam edi uning feʼlida. Hech qachon oʻzbek ayoli son va tirsaklarini, avrat joylarini ochib libos kiymagan. "Ommaviy madaniyat” qayerdan paydo boʻladi? Eng avvalo tarbiyasizlikdan. Saviyasi pastlik odamni shu koʻyga soladi.

Zulhijja XUDOYoROVA, milliy kurash boʻyicha jahon chempioni, 2-sonli BOʻSM ning sport murabbiysi:

– Shirin opa, sizXXI asr oʻzbek ayoli tamoman oʻzgardi, barcha sohalar boʻyicha ilgarilab ketdi, dedingiz. Men ham shu fikrdaman. Lekin eshitib, tahlil qilib oʻtirsam, Gulasal opaning kuyib-pishib gapirganicha bor. Haqiqatan ham biz kompyuterlar, yuksak texnologiyalar asriga qadam qoʻymasimizdan avval (bolaligim esimga tushadi-da) ayollarimizning el ichida oʻzlarini tutishlari boshqacha, goʻzal edi. Ayniqsa, ularning liboslari! Har xil fasondagi atlas va shoyi koʻylaklari, ikki yo bir oʻrim qilib orqasiga tashlab olgan sunbul sochlari yoki boshiga chambarak qilingan sochlari ustidan nafis oʻrab olgan roʻmollari ayollarimizga yanada goʻzallik, joziba bagʻishlardi. Endi koʻcha-koʻyda sochi uzun qizni koʻrsak, xuddi moʻʼjizaga duch kelganday boʻlamiz. Axir zamonaviy boʻlish degani Gulasal opa aytganlariday, ona tilimizni buzib, ruscha-inglizcha soʻzlarni chala-chulpa nutqimizga qoʻshib gapirish yoki qizlarimiz koʻkrak va kindigini ochib, tor shim, tor yubka kiyish, degani emas-ku!

Baʼzan kollej oʻquvchilari boʻlgan qizlarning kafe va oshxonalarda oʻrtaga pul yigʻib, boʻsh vaqtlarini boʻlmagʻur oʻtirishlarga sarflashayotganiga guvoh boʻlaman. Boʻsh vaqt nima oʻzi? Boʻsh vaqt – chegaralanmagan imkoniyat-ku axir! Bu imkoniyatdan balogʻat yoshidagi va bu yoshdan oʻtgan qizlarimiz, barcha ayollar unumli foydalansalar, yomon boʻlmasdi. Boshqalar qanday fikrda, bilmadim-u, mening nazarimda ayol zotining boʻsh vaqti boʻlmasligi kerak. Hech boʻlmaganda bichish-tikishni oʻrgansin, bu–oila iqtisodiga yordam. Sport bilan shugʻullansin, bu mashgʻulot ayolning mustahkam sogʻligi uchun kafolat. Shuni bilamanki, har ikkala mashgʻulot ham ayol shaxsining ijobiy tomonga shakllanishida muhim omil boʻladi. Qolaversa, mamlakatimizda ayollar sportini rivojlantirish borasida Prezidentimiz rahnamoligida juda keng qamrovli ishlar amalga oshirilmoqda. Tumanimizda ham ayollar xohlagancha shugʻullanishlari uchun sport inshootlarimiz eshiklari lang ochib qoʻyilgan. Ayol oilaviy tarzda sport toʻgaraklariga qatnashishi ham mumkin. Bunga ozgina hafsala qilinsa, bas. Agar ayol boʻsh oʻtirsa, u sovuqqon boʻla boshlaydi. Muomalasi, hayotga qarashi borgan sari salbiy tomonga oʻzgarib boraveradi.

Roza GULMONOVA, tuman DSENM shifokori:

– Zulhijja hammamizdan yosh boʻlsa ham juda kuzatuvchan, fikri teran qiz ekan. Tan olish kerak, sportchilar har tomonlama, hatto fikrda ham sogʻlom boʻlishadi. Haqiqatan ham bugungi davr ayoli har sohada ilgarilab ketdi-yu, nazarimda quyoshga intilib oʻsgan daraxt ildizi tufayli rivoj topayotganini sezmagani kabi ayollarimiz zamonaviylashaman, deb maʼnaviy ildizini unutib qoʻyayotganlari yoʻqmi? Sababi, shifokorman, xalq orasida koʻproq boʻlaman. Baʼzan kir suvlarini uyi eshigidan turib koʻchaga "shaloplatib” toʻkayotgan qiz-u kelinlarimizni, hatto katta yoshdagi ayollarni koʻraman. Yoz oylarida oqar suv boʻylarida, Mangʻit arna, Boʻz suv, Qipchoq arna kanallarida kir yuvayotgan, hatto shu kanallarga chelak toʻla axlatni agʻdarib ketayotgan kelinposhshalarni juda koʻp kuzatganman. Endi kechagi ayolning hatti-harakatlari bilan zamonaviy ayollarimizning qilayotgan ishlariga bir baho bering-u, xulosa chiqaring. Xoʻsh, bizning onalarimiz shunday nomaʼqulchiliklarni qilganmi? Albatta, yoʻq! Ular biz qizlarini, yaʼni hozirgi davr ayollarini yonlariga oʻtqazib qoʻyib nasihat qilardilar:

–Oqar suvga tupurma, koʻr boʻlasan. Oʻzingdan kattaning oldidan kesib oʻtma, odobsizlik boʻladi. Sochingni kessang, baxting kesiladi. Yaxshi muomala, chiroyli salomlashish – insonning bezagi, – deb qayta-qayta uqtirardilar. Bunday oʻylab qarasam, ayb oʻzimizda. Biz avvalo ayol, ona va mutaxassis yoki rahbar sifatida oʻz maʼnaviy ildizimizni unutib qoʻyayotirmiz. Qizlarimizga onalarimiz bizga bergan oʻgitlarini takror-takror uqtiramizu oʻzimiz aynan shu oʻgitlarga juda kam amal qilamiz. Oʻzimizcha "zamonaviy, madaniyatli ayol boʻlish”ni istab, yoshimiz 30-35 dan oʻtganida sochimizni kesamiz. Qaysidir xorij davlatining yorligʻi bilan bozorimizda paydo boʻlgan gʻalati bichimdagi tor va ochiq koʻylakni kiyamiz. Har oyda (shundaylar afsuski, oramizda koʻp) hech boʻlmaganda bir marta tumanimizdagi nomdor kafe yoki oshxonalarda "sinfdosh ziyofat”, "qurdosh ziyofat”, "qarindosh ziyofat” degan oʻtirishlarga chiqamiz. Hatto ayrim ayollarimiz bunday ziyofatlar dasturxoniga spirtli ichimliklar ham qoʻyishadi va ... tatib koʻrishadi.

Robiya YOʻLDOShEVA, jurnalist:

– Rozajonning gapida jon bor. Yaxshisi, bir hayotiy misol keltiray: tahririyatimizga kelgan yoshgina kelinchak oʻzi yashaydigan ovul oqsoqolidan shikoyat qildi:

–Uch oydan beri farzandimga nafaqa tayinlashmayapti, yordam bering, – dedi u.

–Xoʻp, yordam beramiz, Sizga nima sababdan nafaqa tayinlashmayotganini surishtiramiz.

Shunday deb kelinchak aytgan OFY raisi bilan telefon orqali bogʻlanib, vaziyatni tushuntirdim. Maʼlum boʻlishicha ayolning eri bir necha yil shartnoma asosida Koreya davlatida ishlab qaytibdi. Yangi imorat qurib, yengil mashina olibdi. Hozirgi kunda shaharlararo yoʻnalishlar boʻyicha kirakashlik qilarkan. Bu oila kam taʼminlangan bolali ayollar uchun beriladigan nafaqaga umuman muxtoj emas ekan. Men ayolga buni yotigʻi bilan tushuntirsam, nima deydi deng: "Oʻzimning bordi-keldilarim, "tashkil”larim (ziyofat demoqchi) uchun kerak opa, erim "yigʻishtir, bularing uchun pul bermayman”, deyapti”, deydi-da! Qarang! Ayol-ning oilasi oʻziga toʻq, hamma tomonlama yaxshi taʼminlangan ekan.

– Eringga rahmat, juda toʻgʻri aytibdi, - dedim ayolga. – Yaxshisi, ering aytganiday, "tashkil” degan muammoni yigʻishtirib, ikki nafar bolaning tarbiyasiga qara.

Koʻrdingizmi, ayrim ayollarimiz toʻqlikka shoʻxlik qilib, xudbinlashib bormayaptimi? Davlat tomonidan kam taʼminlangan oilalarga farzandlarini ijtimoiy himoyalash maqsadida ajratilgan mablagʻlar hisobidan nafaqa "toʻgʻrilab”, har xil koʻngilochar oʻtirishlar qilishni xohlayotgan ayollar, toʻgʻrisi, meni kechirsinlar-u oʻz qobigʻiga oʻralib, oʻzidan narini koʻrmaydigan boqimandalarga aylanib qolishayotir. Kimdir oʻgʻil-qizim yaxshi yeb-ichsin, yaxshi oʻquv yurtlarida oʻqib, ilmli boʻlsin, deb yugurib-yeladi, tadbirkorlik bilan shugʻullanadi. Yana kimlardir davlatning gʻaznasiga koʻz tikib, shaxsiy rejalar tuzadi, oʻgʻil-qiziga yaxshi tarbiya berish oʻrniga boʻy yetgan qizini yo oʻgʻlini ergashtirib "qarindosh ziyofat”, "qurdosh ziyofat” qabilidagi oʻtirishlarga boradi. Tagʻin bu kabi ziyofatlarni nomdor kafe yoki oshxonalarda, hatto ayrim toʻyxonalarning xilvat xonalarida oʻtkazishadi.

Tamara YuSUPOVA, tadbirkor, "Tamara-Feruza” xususiy korxonasi rahbari:

– Mustaqilligimizning dastlabki yillarida xalqimiz hayoti qanchalik ogʻir kechganini bugungi 25-30 yoshdagi biz tengi ayol-qizlarimiz juda yaxshi bilishadi. Lekin ozgina boʻlsa-da yuragida oriyati bor ayol-qizlarimiz birovga, ayniqsa davlatimizga boqimanda boʻlishdan koʻra mehnat qilishni afzal koʻrishadi. Men tuni bilan bozorbop, hammabop kiyim-kechaklar tikib, ertasiga sotuvga olib chiqqan, oʻz mehnati bilan oʻzgalar mehrini qozongan chevarlarni bilaman. Ular misqollab topgan davlati soyasida el-yurt hurmatiga munosib, oʻz oilalarida havasga loyiq turmush tarzini qurishgan.

Baʼzan hayron qolaman, choʻntagida puli kamaygan ayol Alloh marhamati bilan dunyoga keltirgan farzandini boqish, yedirib-ichirish uchun eng maqbul yoʻl – davlatdan nafaqa olish, deb oʻylaydi. Bunday holatni men minnat qilish, deb tushunaman. Nima, OFY dan nafaqa tayinlanmasa, bolangni och qoʻyasanmi, undan koʻra oila iqtisodini koʻtarish yoʻllarini izla, intil,degim keladi.

Esimda: Toshkent shahridagi mashhur "Mashhura” firmasi maʼmuriyati va tuman xokimligining qoʻllab-quvvatlashi tufayli tumanimizda bundan 10-yil avval "Mashhura” firmasining filialini tashkil qilganman. 25 million soʻmlik bank krediti asosida oʻz xususiy korxonamning ishini yoʻlga qoʻydim. Yosh qiz-kelinchaklarni ish bilan taʼminladim. Oʻz qiziqishlarim tufayli yiliga yuzlab ayol-qizlarga chevarlikning nozik sirlari yuzasidan mashgʻulotlar olib borishimga toʻgʻri kelgan. Ishonasizmi, baʼzan bu mashgʻulotlarga qaynona boʻlib qolgan onaxonlar ham qatnashardilar. Oʻsha paytdatuman markazidagi maishiy xizmat koʻrsatish uyidan tashqari, ovullarning har birida bitta-bittadangina tikuvchilik tsexlari bor edi, xolos. Bu tsexlar oʻzini-oʻzi qoplay olmas, mijozlari sanoqligina boʻlardi. "Mashhura” firmasining filialida tahsil olgan sobiq shogirdlarimning koʻpchiligi oʻz biznes loyihalarini ishlab chiqib, xususiy korxona egalari sifatida shakllanganlariga shaxsan oʻzim guvohman. Bugun amudaryolik Mashhuralarning sanogʻiga yetolmaysiz. Biri-biridan oʻzib ishlashyapti ular. Demak, ishlasa, harakat qilsa boʻlar ekan-ku! Bugungi davr ayoli qoʻlini qayerga uzatsa, yetadi. Onalarimiz yashagan yaqin oʻtmish davridagiday cheklashlar, kamsitishlar yoʻq. Birgina bizning tumanimizda 2014-yilning oʻzida 104 nafar ayol-qizga tadbirkorlik faoliyatlarini yoʻlga qoʻyishlari uchun 1 milliard soʻmlik imtiyozli kreditlar berilgani haqida tuman gazetasida oʻqib qoldim. Qarang, davlatimizda ayol-qizlar qanchalikkatta gʻamxoʻrliklar bilan qamrab olingan. Ana shu gʻamxoʻrlikka munosib ham boʻlish kerak-da!

Yulduz TURSUNBOYeVA, Amudaryo akademik litseyi oʻquvchisi:

– Tamara opam juda yaxshi fikr aytdilar. Haqiqatan ham mamlakatimizda ayollarning ijtimoiy faolligini oshirish maqsadlarini ifoda etuvchi barcha qonuniy asoslar yaratilgan. Oddiygina misol, kollej va akademik litseylarni bitiruvchi yoshlarga oʻzlari xohlagan yoʻnalishlarda tadbirkorlik faoliyatini yoʻlga qoʻyishlari uchun kam foizli kreditlar ajratilayotganligining oʻzi mustaqil hayot ostonasiga qadam qoʻyayotgan yoshlar, ayniqsa, qizlarning jamiyatda oʻz oʻrnini topishlari uchun juda katta gʻamxoʻrliklardir. Lekin baʼzan oʻzim bilan tengdosh qizlarning avvalo kasb-korli, xunarli yoki bilimli boʻlishni oʻylamay, erta turmush qurishga shoshilayotganlaridan xafa boʻlib ketaman. Nuroniy yoshdagi momo va buvilarimiz "qiz bolaning hayosi-davlati, hunari – baxti”, – deb bekorga aytishmagan. Onam doim: "epli boʻl qizim, eping – ziynating”, deb oʻgit beradilar. Epli boʻlish degani faqat ishni doʻndirib qoʻyish emas, balki har tomonlama yetuklikka yetishish hamdir. Mening fikrimcha, zamonaviy ayol – bilimdon, epli, kasb-korli, eng muhimi, sharqona muomala madaniyatini egallagan shaxs boʻlishi kerak. Kimga qanday, bilmadim-u oʻzim bilan tengdosh qizlarning moda ketidan quvib, qulogʻiga telefonni yoki naushniklarni yopishtirib, koʻcha-koʻyda ochiq-sochiq kiyinib yurishlarini ahmoqlik deb hisoblayman. Koʻpincha shunday qizlar bizning mentalitetimizga tamoman yot boʻlgan "Valentin kuni” kabi boʻlmagʻur tadbir yoki uchrashuvlarni nishonlab yurishadi. Internet olamidagi buzgʻunchi gʻoyalar bilan toʻldirib tashlangan turli xil saytlarga kirib, "ommaviy madaniyat”ning yoqimsiz jihatlarini oʻzlariga odat qilib olishadi. Ayniqsa, kiyinish bobida. Hayron qolaman, ochiq-sochiq holda koʻchaga chiqib ketayotgan qiziga ota-onasi, ayniqsa, onasi: "yoʻqot, bu kiyimingni!”, demaydimi? Menimcha, onalarimiz aynan shu libosni qiziga ravo koʻrib, falon soʻmga olib bergani va kiyishga yoʻl qoʻygani uchun uyalishlari kerak. Lekin ayrim hollarda qizlarning bunday ochiq-sochiq liboslarni dugonasinikiga kirib kiyib chiqish hollari bor. Qizining koʻchada qanday kiyimda yurganini baʼzi onalar bilishmaydi.Tarbiyaviy ishlarni oiladan boshlash lozim.

Shirin YaNGIBOYeVA:

- Bir holat mening judayam dilimni ogʻritadi. Robiya opa, siz yuqorida fuqarolar yigʻinidan farzandi uchun nafaqa olib, oʻz shaxsiy "bordi-keldi”larini "hal” qilmoqchi boʻlgan yosh kelinchak haqida kuyunib gapirdingiz. Haqiqatan qoʻliga pul tushgan yosh kelinchaklar oʻsha pulga yaxshi yeb-ichish, farzandiga yaxshi yedirish-ichirishdan koʻra koʻproq yangi fasondagi liboslar kiyishni xush koʻrishadi. Hatto erkaklar bilan bir dasturxon atrofida oʻtirib spirtli ichimlikichishni madaniyatlilik belgisi, deb hisoblaydiganlar ham yoʻq emas. Baʼzan bayram va tadbirlarga sochlarini silliq tarab, roʻmol oʻrab kelgan ayollarga bepisand qaraguvchilarni koʻramiz. Koʻziga yasama kiprik yopishtirib, sochlarini har xil ranglarga boʻyab, yuzlariga haddan ziyod upa-elik chaplab tashlab, badanini boʻrttirib libos kiygan kelinchaklar aslida uyalishlari kerak. Jamoat oldida tirsak va sonlarini ochib yurishlik - eng madaniyatsiz, maʼnaviyatsiz ayolning ishi. Bu ham mayli, ayrim yoshlarimiz oila hayotiga tayyor boʻlmasdan erta turmush qurishadi-yu turmush chorrahalaridagi salgina zarbaga dosh bera olmay, esankirab qolishadi. Aql bilan ish tutish, oilasini saqlab qolish uchun harakat qilishdan koʻra ajrashishni maʼqul koʻrishadi. Sababini soʻrasangiz, juda oddiy – kelin qaynonadan, qaynona kelindan norozi. Baʼzi hollarda kuyov bilan xulq-atvorlari toʻgʻri kelmay qoladi. Nima, shuning uchun ajrashib ketish shartmi? Oʻrtada farzand boʻlsa, yanayam yomon. Axir erkak ham odam, qaynona ham ona. Erkak kishiga mehr-muhabbat, qaynonaga esa chiroyli muomala kerak. Yosh kelinchaklarimizning juda koʻpchiligi oddiygina ana shu qoidaga boʻysungilari kelmaydi. Oilada oʻz hukmini yuritgisi keladi. Aytmoqchimanki, Yulduzxon aytganiday, tarbiyaning tamal toshini biz eng avvalo oilada qoʻyishimiz kerak.

Robiya YOʻLDOShEVA:

–Demak, bugungi davr ayollarining ijtimoiy faolligini oshirish, bu boradagi muammolarni hal etishning barcha omillari toʻgʻri tarbiyada. Tarbiya esa albatta, oiladan boshlanadi. Bekorga xalqimiz: "Qushuyasida koʻrganini qiladi”, degan hikmatni yaratmagan. Ayolning har jihatdan barkamol, yetuk shaxs sifatida shakllanishi uchun eng asosiy mezon – oilada yaratiladi, oila maskanida rivojlanadi.

Aziz mehmonlar! Bizning bugungi davra suhbatimizni "Dugonalar, bormisiz, omonmisiz?!” deb nomlashimizdan maqsad – dugonalarni, faol ayol-qizlarimizni bir joyga jamlab, ular bilan tez-tez suhbatlar oʻtkazib turish, shu orqali yosh ayol-qizlarimizga yoʻl-yoʻriqlar koʻrsatish, muammolarni hal qilish borasida birgalikda fikrlashish va harakat qilishdan iborat edi. Bugungi suhbatimiz ana shunday xayrli ishlarimizning debochasi boʻldi, desam aslo yanglishmayman.

Sermazmun va maroqli suhbatlaringiz uchun tashakkur, aziz dugonalar!

Suhbatdosh: jurnalistRobiya YOʻLDOShEVA.

(Foto - OʻzA)