Adabiyot 14.12.2023 👁 213

Jayxun ilhomlari

Yangi Qomusim

Yangi Oʻzbekiston! – Yangi atama,

Yurak tubidagi uygʻoq umidlar.

Ilm osmonida yuksak pogʻona,

Qomusim madhini dillarga joylar.

Uygʻoning, bir qarang, Beruniy bobo,

Avlodlar quvonchi sigʻmay olamga.

Siz bitgan qomuslar, zamonlar osha,

Ming yillik yoʻl bosib, yetdi bizlarga.

Ezgulik yoʻlida sanchib ketilgan,

Oʻsha minoralar qilichday turar.

Ona Yer koʻksidagi jarohatlar ham,

Bitib, unut boʻldi, qolmadi izlar.

Azob ummonida sahrolar kezib,

Havas-la boqarding, qushlarga qarab.

Ilm-fan saroyida nabirang tetik,

Qush boʻlib uchmoqda, qanotlar yasab.

Dillarga zavq berib, koʻzni quvnatar,

Qad rostlab, boʻy choʻzgan shaharlar, kentlar.

Kelajak egasi — yigitlar, qizlar,

Buyuk choʻqqilarga nigohin qadar.

Yangi Oʻzbekiston! Yangi Qomusim,

Hali oʻqilmagan kitobin yozar.

Shu goʻzal hayotning xushboʻy iforin,

Olamga tarating, Siz aziz yoshlar!

Maqsadi, gʻoyasi iymon-eʼtiqod,

Borliqqa nur sochsin yangi kitobing.

Vatanim bagʻrida koʻz ochgan buloq,

Uchinchi Renessans — sening davroning!

Odil ShOMURODOV.

Jonim ichra jonsan, Vatan!

Qum, tuprogʻing — toʻtiyodir,

Sharq-u Gʻarbing — nur-ziyodir,

Qon tomiring — qoʻsh daryodir,

Moʻl bebaho konsan, Vatan,

Jonim ichra jonsan, Vatan!

Tugʻing — mard-u maydonlarda,

Husning, koʻrking —zabonlarda,

Madhing qoʻshiq, dostonlarda

Sen sharafsan, shonsan, Vatan,

Jonim ichra jonsan, Vatan!

Tinchlik, hurlik — shiorsan sen,

Doʻstlarga chin doʻst-yorsan SEN!

Mangu obod diyorsan — SEN,

Musaffo osmonsan, Vatan,

Jonim ichra jonsan, Vatan!

Dono, pirlar farogʻatda,

Qiz-yigitlar saodatda,

Rasululloh shafoatda,

Sen nuri iymonsan, Vatan,

Jonim ichra jonsan, Vatan!

Istiqloldan — sururlaring,

Istiqbolda — gʻururlaring —

Jaloliddin, Temurlaring —

Dovrugʻi dostonsan, Vatan,

Jonim ichra jonsan, Vatan!

Namoyondir xitobida —

Bugun, ertang, har bobida,

Davlat «Qonun Kitobi»da

Bitilgan Nizomsan, Vatan,

Jonim ichra jonsan, Vatan!

Tursunboy Abdullayev.

Avaylaylik, aziz ona tilimizni

(1-dekabr — Qoraqalpoq tiliga

davlat tili maqomi berilgan kun)

Artib tashlab koʻngillardan kirimizni,

Turaylik-chi, qoʻllab biri-birimizni.

Tilsiz koʻrmoq qiyin boʻlar kunimizni,

Avaylaylik, aziz ona tilimizni.

Oʻzga til ham kerak bilgil hayot uchun,

Ona tiling kerak doim birlik uchun.

Borligini koʻrsataylik tilning kuchin

Avaylaylik, aziz ona tilimizni.

Ona tilda soʻylang mudom soʻzingizni,

Angla xalqim asli oʻzing kimligingni.

Tilimizni yoʻqotmang, oching koʻzni.

Avaylaylik, aziz ona tilimizni.

Har kimsaga oʻz tili ulugʻ sanalar,

Til — millatning koʻrki, demish donolar.

Shuning uchun unutmaylik zamondoshlar,

Avlodlarga yetkazmoq burch, tilimizni.

Angsatboy QARAJANOV, huquqshunos.

Qoraqalpoq tilidan Oygul Rajabova tarjimasi.

Qishlogʻim

Taʼrifing yozishga olarkan qalam,

Xayoldan koʻp soʻzlar oʻtmoqda bir-bir.

Qizilcholidan soʻng, qoʻnim topganim,

Yurtlarning aʼlosi — bizning Kuy koʻpir.

Oqarkan oʻrtada Mangʻit arnamiz,

Dehqonlarimizda yoʻqdir xavotir.

Koʻzni quvontirib yashnar ekinlar

Xirmoni koʻp qishloq boʻlar, Kuy koʻpir.

Fidoyi insonlar yashnatar elni,

Shifokor, muhandis, muallim, shopir.

Traktor boshqargan qizlari ham bor,

Fayziga-fayz qoʻshib borar Kuy koʻpir

Deydilar: najotkor Xoljon tabibdan,

Tabobat ilmida qolmagan koʻp sir.

Ajdodlari undan shifosin topgan,

Avlodlarning yurti — soʻlim Kuy koʻpir.

Oʻxshashin topmassan bunday makonning,

Qomuslardan qara, yutubdan qidir.

Eshon bobolardan bizga merosdir.

Mingturgʻan ogʻalar suygan Kuy koʻpir.

Temir yoʻl ham oʻtdi, poyezd kelmoqda,

Yurt ravnaqi aniq, tolesi vofir.

Xitoy, Oʻzbekiston — qoʻshnilar bilan,

Birga yayrab, yashnab borar Kuy koʻpir.

Bunda siylab yashar, har kim bir-birin,

Yoshlar muruvvatli, qarilari — pir.

Alqamay boʻlarmi, bundayin yurtni,

Kelajagi porloq qishloq — Kuy koʻpir.

Faqat... Yoʻllar rasvo, bogʻcha esa yoʻq,

Iltimos, boʻlaylik endi ogʻzibir.

«Openbyudjet»da biz gʻolib chiqsak,

Shunda obod qishloq boʻlar Kuy koʻpir.

Toʻrt tomon oboddir. Nahotki bizning,

Koʻzlarni moy bosdi, quloqlarni kir.

Harakat qilaylik, hammamiz shunda,

Jannatmakon qishloq boʻlar — Kuy koʻpir.

Qizilcholi

Mubolagʻa, boʻrttirishlar qoʻshmasdan,

Faqat aytsam borini oʻz holicha.

Eshitganni nomlari lol qoldirar,

Koʻp mashhurlar oʻtgan Qizilcholida.

Mehmonlarni rozi qilib joʻnatgan,

Dasturxoni va tildagi bolida.

Ham taomga, ham gurungga toʻydirgan,

Hotamtoylar yashar Qizilcholida.

Koʻp xislatlar ayon boʻlar birgina,

Mezbon aytgan takror «olho-ol»ida.

Toʻy qilsalar, toʻkib tashlar borini,

Keng feʼllilar eli Qizilcholi-da.

Yurt ravnaqin burchim, degan koʻngli bor,

Navqiron, keksami, navniholida.

Shuning uchun yashnab borar tobora

Azamatlar bor-da, Qizilcholida.

Avvallari qovun ekkan qayirda,

Bu kunlari umid faqat sholida.

Xirmonlarni olaversa, tonnalab,

Toʻy avjini koʻring, Qizilcholida.

Zigirikda qanot oʻzi norma der,

Gʻayrati zoʻr Amin qassob — cholida

Qartaysa ham nafs qurgʻur qoʻydirmas,

Qoʻluzlikning moʻli Qizilcholida.

Yakka oʻzi qadrin topmas raqamlar,

Qadri uning yonidagi nolida.

Aholisi bagʻri butun insonlar,

Aziz boʻlib yashar, Qizilcholida.

Ahmad NAFASOV.

Shafqatsizlik

Ey naslim, siz mening jonim avlodim,

Bunchalar toshbagʻir boʻlib qolgansiz.

Quyoshga boʻy choʻzgan maysani... koʻrdim.

Toptaysiz, ezgʻilab, yanchib ketasiz.

Daraxtlar jimgina maʼyus tebranar.

Dir-dir titrab ketar, insonni koʻrib,

Inson hech joni achimay, arralayverar.

Maqsadi — pul qilish, oʻtinni sotib.

Shamolda hilpirab ochilgan lola.

Anov bolakayning koʻzini oldi,

Gulni uzib olgan, beshafqat bola.

Bir hidlab koʻrdi-yu, soʻngra irgʻitdi.

Oyoqlar tagida yanchilgan lola.

Ayanchli ahvolda: “toshbagʻir”, dedi,

Axir u ochilib jumla olamga,

Husnini koʻrsatib qoʻymoqchi edi...

Zuhra Ahmedova.

Qomusim

Qomusim — mening baxtim,

Ozodligim ramzidir.

Biz yoshlarga yoʻl ochuvchi

Qanotimdir, faxrimdir.

Qonunlarni biz bilib,

Ulgʻayamiz doʻst boʻlib.

Ertaga biz, albatta,

Sodiq avlod boʻlamiz.

Qomusimizni bilib,

Dunyoga doston qilib.

Yangi Oʻzbekistonda

Bilimli yoshlar boʻlib.

Qonunlarni, albatta,

Biz oʻrganib olamiz.

Va birlashib yagona

Oʻzbekiston boʻlamiz!

Zilola RajabbOyeva,

24-maktab oʻquvchisi.

Mangʻitim

Yashnagan gul diyorim,

Mangʻitimsan, Mangʻitim.

Chaman-chaman gulzorim,

Mangʻitimsan, Mangʻitim.

Amudan suv ichgan el,

Sinovlardan oʻtgan el.

Bogʻlarida bitgan gul,

Mangʻitimsan, Mangʻitim.

Istiqloldan nur olgan,

Nuri har yon taralgan.

Nishon olgan, nom olgan,

Mangʻitimsan, Mangʻitim.

Amudaryo — faxrimsan,

Ravnaq topgan shahrimsan.

Maqtovlarga haqlisan,

Mangʻitimsan, Mangʻitim.

Chaman-chaman gulzori,

Dilsayyorning diyori.

Yashnayotgan shahari,

Mangʻitimsan, Mangʻitim.

Xudoybergan JUMAMURODOV,

Bogʻ mahallasi.

Boylik abadiy emas

Koʻplar koʻngil qoʻyadi,

Jaraq-juruq pullarga.

Pulin hidlab yuradi,

Bu dunyodan oʻtguncha.

Oʻtkinchidir, bu hayot,

Qoladi bor boyliging.

Pullar qutqara olmas,

Dunyodan oʻtar chogʻing.

Temurbek Rahmatullayev, 30-maktab oʻquvchisi.

Senga sheʼrlar yozsam...

Senga sheʼrlar yozsam, gʻirt devonaman..

Yetti falakdan ham balandroq turib.

Har ikki dunyodan yuzimni burib,

Sening dunyoyingda yashab qolaman.

Senga sheʼrlar yozsam, gʻirt devonaman...

Layli hech tuymagan hislarni tuyib.

Soʻz izlab, ming kuyib, bir seni suyib

Qolgan oshiqlardan sovib qolaman!

Senga sheʼrlar yozsam, gʻirt devonaman...

Sen tanho ilhomim, mening nazmimda.

Men-chi?! Kim erurman sening nazdingda,

Balki yagonaman? Yo begonaman!

Aziza Madrahimova.

Yoʻqlang, doʻst-u birodarlarni

Bugun eslang, qadrdonlarni,

Barcha doʻst-u birodarlarni.

Biling, doʻstning eskisi boʻlmas,

Boʻlgan sizga jonajonlarni.