Bu yerda “lager”dan qochmaydigan, zukko bolajonlar bor...
“Qaldirgʻoch” yozgi dam olish oromgohidagi taassurotlar
Dunyoning eng goʻzal tabiatga ega joyi Shveytsariya boʻlsa, Amudaryoning eng goʻzal, bahavo joyi Doʻrman ovuli boʻlsa ajab emas. Ijodiy guruhimiz bilan “Qaldirgʻoch” bolalar yozgi dam olish oromgohi tomon yoʻlga tushar ekanmiz, Doʻrmanning suluv koʻchalarida koʻnglimizdan ajib tuygʻular kechdi: toza havo, yam yashil tabiat, baxtli bolakaylarning shodon qiyqirigʻi...
Yaqinda “Taraqqiyot koʻzgusi” gazetasi tahririyatining “Bilimli va maʼnaviyatli yoshlar bilan Uchinchi Renessans sari” nomli grant loyihasi doirasida ushbu oromgohga tashrif buyurdik. Tashrifdan maqsad – bolajonlarni tumanimizdagi yozuvchi va shoirlarning, jurnalistlarning ijod mahsullaridan bahramand qilish va ularning madaniy hordiq chiqarishiga hissa qoʻshish.
Dastlab, oromgohning musiqa toʻgaragi faoliyati bilan tanishdik. Ruslan Ismailov rahbarlik qilayotgan ushbu toʻgarakda bolajonlar “Onajon – Vatan” qoʻshigʻini birgalikda joʻr boʻlib kuylashdi. Soʻng, tahririyat xodimlari, ijodkorlar Shahzod Anvar va Aziza Madrahimova bolakaylarning qiziqishlari bilan oʻrtoqlashdi. Bolajonlar yod olgan sheʼrlaridan, oʻqigan ertaklaridan parchalar oʻqib berishdi.
Shundan soʻng, davra suhbati boshlandi. Davra suhbatini tumanimizdagi 84-sonli maktab direktori, “Qaldirgʻoch” bolalar yozgi dam olish oromgohi rahbari Erkinboy Qurbonboyev ochib berdi va olib bordi.
Ijodiy va koʻtarinki kayfiyatda boshlangan davra suhbati tumanimizning isteʼdodli ijodkori, shoir Shomurod Xoʻjanov sheʼrlari bilan davom etdi. Keyin esa, navbat Shahzod Anvar sheʼrlariga berildi. Ijodkor bolajonlarning orzu intilishlari, kitoblarga boʻlgan mehri, kitob oʻqishning ahamiyati toʻgʻrisida aytib oʻtdi. Va davradagi bolajonlarning yod olgan sheʼrlarini maroq bilan tingladik. Umidjon Shukurullayev, Boburjon Rajapov, Sevinchoy Hamroyeva, Nodirbek Ibragimov, Sevinchoy Rajabbayeva, Behruzbek Farhodov hamda Sarvar Yangiboyev kabi oromgoh dam oluvchilari oʻzlarining begʻubor orzularini bayon etib, Vatanni madh etuvchi sheʼrlaridan oʻqishdi.
Ijodkor Aziza Madrahimova esa bolajonlarga “Oʻzbekiston bolalari madhiyasi” nomli sheʼridan parcha oʻqib berib, kichkintoylarni kelajakda komil inson boʻlish uchun ilm olishga, kitoblarga doʻst tutinishga daʼvat etdi.
Darvoqe, bugungi kunda ushbu oromgohda tumanimizning turli hududlaridan tashrif buyurgan 500 nafar bolajonlar miriqib dam olishmoqda. Tongni ertalabki badantarbiya bilan boshlaydigan shoʻx bolakaylar kun davomida kompyuter, sport, musiqa toʻgaraklariga qatnashishadi. Kechqurun esa bolajonlarga sheʼriyat kechalari uyushtirilib turiladi.
Dunyoning qaysidir burchagidagi bir jajji qalb oʻq ovozidan choʻchib uygʻonadi, yana biri qorni toʻyib ovqat yemaydi... Bizning ona Oʻzbekistonimizda esa jajjilarimiz yozda mana shunday dam olish oromgohlarida, istirohat bogʻlarida, ota-onalari bagʻrida baxtli bolalik gashtini surib ulgʻaymoqda. Buning uchun esa, faqat shukur qilish kerak. Qoʻldan kelganicha yaxshilik qilmoq, ezgulik ulashmoq joiz.
Aziza Madrahimova
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
