Fuqarolarning uy-joyga boʻlgan huquqlarini eʼtirof etish boʻyicha amaliy ishlar davom etmoqda

Maʼlumki, Oʻzbekiston Respublikasi Prezidentining 2023-yilning 28-iyun sanasida imzolangan “Qoraqalpogʻiston Respublikasi aholisini ijtimoiy qoʻllab-quvvatlash hamda jismoniy shaxslar tomonidan qurilgan uy-joylarga boʻlgan huquqlarni eʼtirof etish toʻgʻrisida”gi farmoni bilan respublika boʻylab fuqarolarning uy-joyga egalik qilish huquqlarini taʼminlash boʻyicha amaliy ishlar yoʻlga qoʻyilgan edi. Hududlarda farmon ijrosini taʼminlash, shuningdek, aholiga mazkur farmon mazmun-mohiyati va ahamiyatini tushuntirish borasidagi ishlar davom etmoqda.

Xususan, yaqinda Amudaryo tumani Oybek mahallasida yashovchi uy-joy egalariga koʻchmas mulk huquqini eʼtirof etuvchi Qoraqalpogʻiston Respublikasi Joʻqorgʻi Kengesi Prezidiumi qarori hamda tegishli hujjatlar topshirildi.

Jarayonda Davlat kadastrlari palatasi Amudaryo tumani filiali muhandisi Oʻtkirbek Hayitjonov, Oybek mahalla fuqarolar yigʻini raisi Azamat Xidirov, mahalladagi hokim yordamchisi Mahmud Saparboyevlar ishtirok etdilar. Masʼullar xonadonlarga uyma-uy kirgan holda uy-joyga egalik qilish hamda turar joy joylashgan yer maydoniga ijara huquqini eʼtirof etuvchi Prezidium qarorlarini oʻz egalariga tantanali tarzda topshirdilar.

Mahalladagi Fitrat koʻchasi 12-uyda yashovchi Azad Qurbaniyazov koʻp yillardan buyon uy-joyining kadastr hujjati yoʻqligi sababli sarson boʻlib kelayotgan edi. Masʼullar Azat Qurbaniyazovga uy-joyiga egalik huquqini eʼtirof etishni nazarda tutuvchi qarorlarni topshirdilar hamda unga Prezident farmonining respublika ijtimoiy-iqtisodiy rivojidagi ahamiyati xususida maʼlumotlar berdilar.  

Istiqlol koʻchasi 17-uyda yashovchi Baxtiyor Toʻqliboyev ham turar joy imoratiga nisbatan mulk huquqi hamda ular joylashgan yer uchastkalariga ijara huquqini eʼtirof etishni nazarda tutuvchi hujjatga ega boʻldi. Xonadon egasi bilan suhbat chogʻida Davlat kadastrlari palatasi Amudaryo tumani filiali muhandisi Oʻtkirbek Hayitjonov ushbu qaror asosida kadastr hujjatini olish uchun ariza berishi lozimligi, kadastr hujjatini olgandan keyin yer-mulk egasi qator imkoniyatlarga ega boʻlishi xususida tushuntirishlar berdi.

Taʼkidlanganidek, kadastr hujjatini olgan fuqarolar koʻchmas-mulk bilan bogʻliq har qanday munosabatlarda ishtirok eta oladi, farzandlarini hududdagi davlat bogʻchalariga roʻyxatga qoʻya oladi, oldin 3 baravar hisoblangan soliq miqdori 1 baravarga kamayadi, oʻzi yashayotgan hududga roʻyxatga tura oladi, turar joyini sotish, sovgʻa qilish hamda meros qoldirish huquqiga ega boʻladi, turar joyini garovga qoʻyish orqali kredit mablagʻi olib, tadbirkorlik faoliyati bilan shugʻullanishi mumkin.

Masʼullar mahallaning Muqimiy koʻchasidagi 17-uyda yashovchi Raziya Yoʻldasheva xonadonida ham boʻldilar va fuqaroga kadastr hujjatini olgandan keyin qoʻlga kiritiladigan imkoniyatlar xususida batafsil maʼlumotlar berdilar.

Qoraqalpogʻiston Respublikasi Joʻqorgʻi Kengesi Prezidiumining tegishli qarorini olgan fuqarolar uy-joyga egalik huquqini eʼtirof etuvchi hujjatning berilganidan xursand ekanligini, davlatimiz rahbari tomonidan berilayotgan imkoniyatlardan minnatdor ekanini bildirdilar.

Charos Arslonova, tuman hokimligining Axborot xizmati rahbari.