JASORAT VA MATONATGA TOʻLA HAYoT YOʻLI
Mangʻitlik Ibodulla bobo va Sholmon momo Matqurbonovlar xonadoniga 1943-yil bahorida toʻngʻich oʻgʻil, norgʻul yigit Oʻrozboy Ibodullayevningjanglardan birida qahramonlarcha halok boʻlganligi haqida qoraxat keldi.
Bunday ogʻir va qaygʻuli kunlarda Ibodulla boboning ikkinchi oʻgʻli Bozorboy Ibodullayev jangga otlandi. Janglarning birida, u quroldoshlari bilan dushmanni toʻxtovsiz quvib borayotganda minalashtirilgan oʻrmondan oʻtishiga toʻgʻri keldi. Oʻrmon ichkarisiga ancha kirilganda yonidagi quroldosh doʻstining bexosdan bosgan qadami minaga toʻgʻri kelib, mina portlashidan bu safdoshi tilka-pora boʻlib ketdi, Bozorboy Ibodullayev esa chap qoʻlidan ogʻir yarador boʻldi. Bu – 1943 yil 15-mart kuni sodir boʻlgan edi.
Qahramonimiz Bozorboy ota Ibodullayev jarohati tufayli urushdan qaytganidan keyin sobiq Mangʻit paxta tozalash zavodida qirq bir yil mehnat qildi. Bu davrda u uy-joyli boʻlib, dilbar qiz Halima Jumatova bilan oila qurishdi va saodatli umr kechirishdi. Ular besh nafar oʻgʻil-qizlarni dunyoga keltirishdi. Ulardan oʻttiz nafarga yaqin nevara, chevaralar koʻrishdi. Bayram kunlari ular toʻplanishganda Bozorboy ota Ibodullayevning bagʻri quvonchlarga toʻlib-toshib ketadi.
Yaqinda Qoraqalpogʻiston Respublikasi Joʻqorgʻi Kengesining Raisi M.Yerniyozov, tuman hokimligi xodimlari va boshqa tashkilot, muassasalar rahbarlari tabarruk inson Bozorboy ota Ibodullayev xonadonida boʻlishib, samimiy muloqot jarayonida unga mustahkam sogʻlik-salomatlik, uzoq umr tilab, qimmatbaho sovgʻalar taqdim qildilar. Otaxonga "Ikkinchi jahon urushidagi Gʻalabaning 70-yilligi” esdalik yubiley medali tantanali ravishda topshirildi. Bundan Bozorboy otaning koʻngli togʻday koʻtarildi.
Biz ham oʻz umrini jasorat, matonat xislatlari bilan ziynatlagan, hayotda halol mehnat qilib yashagan bagʻri keng, mehri daryo, sabr-qanoatli bu tabarruk insonga farzandlari va nevara, chevaralari bagʻrida yana uzoq yillar saodatli hayot kechirishini tilab qolamiz. Davramizda hamisha Bozorboy otadek tabarruk insonlar bor boʻlsin!
Qobul ShOMURODOV.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
