EHTIROM
Men maktabga borgan ilk kunimni hali-hanuz yaxshi eslayman. Maktab hovlisida katta yigʻilish boʻldi. Keyin sinfga kirdik, bizni Qurbonboyev Jumaboy aka degan ustoz kutib oldi va oʻsha kundan boshlab u ikkinchi otamizdek boʻlib qoldi. Ustoz sabr-toqat bilan harflarni oʻrgata boshladi. Men koʻp narsalarni bilishni xohlardim. Oʻqituvchimiz va sinfdoshlarim barchasi bir ovozdan meni sinf sardorligiga saylashdi. Bu vazifa meni yanada koʻproq oʻqishga, faol boʻlishimga va kelgusida ustozim kabi yetuk oʻqituvchi boʻlishga undagan boʻlsa, ajab emas.
Yuqori sinfga chiqqanimizda Bobojonov Xidir aka rahmatlik ona tili va adabiyot fanidan oʻqitgan edilar. Maktabni aʼlo baholarga tamomlab, oliy oʻquv yurtiga sirtdan oʻqishga kirdim. Sirtqi boʻlimda asosiy ishlar uyda bajarilardi. Kurs ishi yozishni uyga topshiriq qilib berishdi. Kurs ishim mavzusi: "Ot soʻz turkumi” va bitta matnni morfologik tahlil qilish edi. Bu topshiriqlarni bajarish uchun ustozim Xidir aka Bobojonovdan kerakli kitob soʻrab uyiga bordim. U kishi juda mehribon, bagʻri keng inson edi. Ustoz oʻz xonasida gazeta oʻqib oʻtirgan ekan. Meni yaxshi kutib oldi. Ustozga kelishim sababini aytib, kurs ishimni yozishda maslahat soʻradim. Oʻshanda ustoz erinmay menga kurs ishim yuzasidan keng tushuntirishlar berdi. Lekin qanday yozish haqida aytmadilar.
Ustoz bilan xayrlashib, oʻzimcha undan xafa boʻlib qaytdim. Kerakli kitoblarni topib, kurs ishimni yozishni boshladim. Matn ustida ishlashga koʻp vaqtim ketdi, soʻzma-soʻz tahlil qilish kerak edi. Nihoyat yozib boʻldim. Ustozga koʻrsatish uchun uyiga shoshildim. U qoʻliga daftarimni olib, koʻzoynagini taqib, oʻqiy boshladi. Oʻqishdan bosh koʻtarib:
- Buni oqqa koʻchirsang boʻladi, juda yaxshi yozibsan. Matndagi soʻzlar ham toʻgʻri tahlil qilingan, oʻz ustingda izlanishing natijasi bu, - dedi.
Bekorga ustozdan xafa boʻlibman. Meni qiyinchiliklarga, izlanishga, sabr-toqatli boʻlishga oʻrgatgani uchun ham ustozdan minnatdorman. Oʻqish muddati boshlandi. Kurs ishimni domlamga topshirdim. Ancha vaqtdan keyin bahosi eʼlon qilindi. Kursdoshlarimga mening ishimni namuna qilib koʻrsatdi va bahosi "5” ekanini aytdi.
Meni ustoz hayotda hamisha izlanib, intilib yashashga oʻrgatdilar. Hozirgi kunda oʻqituvchi boʻlib, men ham oʻquvchilarimga intiling, oʻqing, oʻrganing, albatta maqsadingizga erishasizlar, deyman. Ish faoliyatimda hamon rahmatlik ustozim Xidir aka Bobojonovning pedagogik uslubiga tez-tez murojaat qilaman. Va bu aziz insonning porloq xotirasi oldida qarzdorlik hissi bilan yashayman.
Gulnora EShIMBETOVA, 8-sonli maktab oʻqituvchisi.
(Foto - http://uza.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
