POChTA ALOQASI XIZMATLARI SIZNI QANOATLANTIRADIMI?
Oʻzbekiston Respublikasi oʻz mustaqilligiga erishganidan soʻng davlatimizda fuqarolarning ijtimoiy turmushini yaxshilashga, isteʼmolchilarga jamiyatning barcha sohalarida koʻrsatilayotgan xizmatlardan erkin foydalanishga imkoniyatlar yaratib berish va ularning qonuniy huquqlarini ximoya qilishga asosiy eʼtibor qaratilmoqda.
"Oʻzbekiston pochtasi” aktsiyadorlik jamiyati foydalanuvchilarining pochta aloqasi universal xizmatlariga boʻlgan talablarini qanoatlantirishga, jumladan pochta varaqchalari, xatlar, banderollar va mayda paketlarni Oʻzbekiston Respublikasi doirasida maqbul narxlarda joʻnatish va yetkazib berish (topshirish) xizmatlari koʻrsatish, shuningdek shartnoma asosida davriy matbuot nashrlariga obuna rasmiylashtirish, obunachilarga yetkazib berish, fuqarolardan kommunal xizmatlar boʻyicha toʻlovlarini qabul qilish va boshqa qoʻshimcha xizmatlar koʻrsatish vazifalari yuklatilgan.
Ushbu sohada foydalanuvchilarga sifatli xizmatlar koʻrsatilishini nazorat qilish Aloqa, axborotlashtirish va telekommunikatsiya texnologiyalari sohasida nazorat boʻyicha davlat inspektsiyasi zimmasiga yuklatilgan boʻlib, mazkur vazifalarni bajarishda inspektsiyaning Qoraqalpogʻiston Respublikasi hududiy boʻlinmasi tomonidan xoʻjalik yurituvchi subʼektlar faoliyatiga aralashmagan holda amalga oshirilayotgan nazorat va monitoring ishlari natijasida isteʼmolchilarga koʻrsatilayotgan pochta aloqasi xizmatlarining sifatini yanada yaxshilash zarurligi holatlari aniqlanmoqda.
Misol tariqasida, inspektsiyaning tegishli buyrugʻiga asosan hududiy boʻlinma tomonidan oʻtgan 2015-yil davomida Oʻzbekiston Respublikasi hududida pochta joʻnatmalarini egalariga belgilangan muddatlarda yetkazib berilishini nazorat qilish maqsadida buyurtmali va oddiy xatlar joʻnatilib, monitoring ishlari olib borilishi natijasida pochta aloqasi xodimlari tomonidan xatlarni qabul qilish, ishlov berish, joʻnatishga tayyorlash va yetkazib berishda bir qator kamchiliklar aniqlandi. Ayrim holatlarda xatlarni koʻrsatilgan manzillarga yetkazib berishda belgilangan nazorat muddatlarining buzilishi holatlari ham kuzatilib, tegishli choralar koʻrildi.
Aniqlangan kamchiliklarni bartaraf etish va ularning oldini olish maqsadida hududiy boʻlinma xodimlari tomonidan, xizmatlar koʻrsatish joylariga chiqqan holda, xoʻjalik yurituvchi subʼektlar xodimlari ishtirokida sohaga doir qonun talablarining bajarilishi va meʼyoriy hujjatlar talablariga amal qilish boʻyicha profilaktik uchrashuvlar oʻtkazilib, xizmat koʻrsatishda foydalanish uchun hududiy boʻlinma tomonidan ishlab chiqilgan qoʻllanmalar tarqatilib, tushuntirish ishlari olib borilmoqda.
Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi tomonidan pochta joʻnatmalarini yetkazib berishda nazorat muddatlari va sifat koʻrsatkichlari belgilangan. Agar pochta aloqasi xizmatlarida ushbu meʼyorlar buzilishi hollari uchrasa yoki boshqa muammolar yuzaga kelsa, shuningdek pochta aloqasi xizmatlarining sifatini oshirish boʻyicha oʻz fikr-takliflaringiz mavjud boʻlsa, 224-01-11 raqamli "Ishonch telefoni” orqali Aloqa, axborotlashtirish va telekommunikatsiya texnologiyalari sohasida nazorat boʻyicha davlat inspektsiyasi Qoraqalpogʻiston Respublikasi hududiy boʻlinmasiga murojaat qilishingiz mumkinligini yana bir bor eslatib oʻtamiz.
M.ALLAMBERGENOV,
Aloqa, axborotlashtirish va telekommunikatsiya texnologiyalari sohasida nazorat boʻyicha davlat inspektsiyasi Qoraqalpogʻiston Respublikasi hududiy boʻlinmasi inspektori.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
