Baxt saroyingizni qurishda asqotadi
"Aziz kelinchak!
Siz kichkina qizaloq ekanligingizdayoq kelin boʻlishni orzu qilgansiz. Dugonalaringiz bilan "kelin-kelin” oʻyinlaringiz boʻlardi. Dastlabki "kelin salom”ingizni eslay ham olmaysiz. Ehtimol, ikki yoshingizda onangizning harir roʻmolini olib "kelin salom” qilib, kattalarning olqishini eshitgansiz, bundan quvonib, qayta-qayta salom qilavergansiz. Oʻshanda "Baxtli kelin boʻlgin”, deb duo qilishgan...”
Oʻzbekiston xalq yozuvchisi Tohir Malikning "Kelinlar daftariga” deb nomlangan risolasi bolalikning begʻubor xotiralarini yodga soluvchi mana shu jumlalar bilan boshlanadi. Darhaqiqat, qiz bola borki, kelin boʻlishni ne-ne orzu havaslar ila, suyukli qaynonasiga kelin emas, balki qizlarcha yaqin boʻlishni, saodatli "Baxt saroyi”ni qurishni orzu qiladi. Ammo mana shu saroyni qurish, toʻgʻrirogʻi, baxtli va mustahkam oilani barpo etish uchun bu kabi shirin orzularning oʻzi kamlik qilmasmikin?
Oila qurayotgan yosh kelin-kuyovlar qanday fazilatlarni oʻzlarida mujassamlashtirishi keragu, qanday illatlardan voz kechishi kerak? Taniqli yozuvchimizning mana shunday tarbiyaviy ahamiyatga ega boʻlgan "Kelinlar daftariga” deb nomlangan kitobi aynan mana shu savollarga javob bera oladi.
Maʼnaviy-maʼrifiy, axloqiy mavzudagi bu risola qirqta suhbatdan iborat. Unda hayot tajribasi yoʻq kelin va kuyov baxt saroyini qurishda nimalarga ahamiyat berishi zarurligi haqida batafsil soʻz yuritilgan.
Bu risolada "Oila halovati – jamiyat halovati”, "Nikoh”, "Iffat va hayo”, "Vaqt qadri” kabi bir qancha dolzarb mavzularda soʻz boradi. Ushbu risolani oʻqib turib men ham oila va mustaqil hayot haqidagi tasavvurlarimni boyitdim. Hamda bundagi purmaʼno fikrlar, nafaqat kelinlar uchun, balki qizlar uchun ham oʻta muhim ekanligini angladim.
Dono xalqimizda: "Qiz bola beshikka tushdi, sepi sandiqqa” degan maqol bor.
Ha, qiz bola tugʻilibdiki, onasi unga atab turli xil sep-u sarpolar yigʻishni boshlaydi. To, qiz bola voyaga yetguncha bu sandiqni yaxshi niyatlar ila boyitib boradi.
Onajonlarimiz, buvijonlarimiz shuning barobarida biz qizlarning dil sandigʻimizni ham boyitib, oilaning naqadar muqaddas ekanligini ongimizga singdirib boradilar. Biz esa bu oʻgitlarga quloq tutgan holda mustaqil hayotga qadam qoʻyamiz.
"Hech kim oʻz-oʻzidan "yomon kelin” yoki "yomon qaynona” boʻlib qolmaydi, bu borada ularning uquvsizligi, hayot tajribalarining yetishmasligi sabab boʻlishi mumkin”, deydi yozuvchimiz.
Aziz kelinchak! Aziz dugonalar!
Men sizlarga mana shu "Kelinlar daftariga” deb nomlangan risolani oʻqib chiqishingizni tavsiya qilaman. Sababi bu kitob peshonamizga surib oʻqishga arziydi.
Ajab emas, bu kitob oʻsha baxt saroyini qurishimizga sabab boʻlsa.
Aziza MADRAHIMOVA.
(Foto - http://glotr.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
