ChEKIShNI TAShLAMOQChIMISIZ? BU QOʻLINGIZDAN KELADI!

Jahon Sogʻlikni saqlash tashkiloti tomonidan (JSST) 1987-yil 31-may - Butun jahon tamakisiz kun deb eʼlon qilindi. Ushbu kun "Tamakisiz hayot” shiori ostida xotin-qizlar va bolalar organizmiga tamakining ikkilamchi tutunining zararli oqibatlari va ularning oldini olish mavzusida davra suhbatlari, sport tadbirlari, rasmlar koʻrik-tanlovlari tarzida keng nishonlanadi.

Chekish koʻpgina kasalliklar sababchisi boʻlmay, alohida kasallik – tamakiga qaramlik hamdir. Chekishni tashlashni ahd qilmoq qiyin va muhim masala. Lekin chekishni tashlash hech qachon kech boʻlmaydi. Agar oʻpkangiz zararlangan boʻlsa ham siz chekishni tashlasangiz, uning "qarishi” sekinlashadi, xuddi chekmaydigan kishilar kabi.

Chekish oʻpkani zararlaydi. Kislorod yetishmasligi va bronxlardagi shamollash sababli, kuchli, uzoq davom etuvchi yoʻtal bezovta qiladi. Natijada ogʻir surunkali oʻpka kasalligi rivojlanadi. Tamaki tutunida 3000 dan ziyod kimyoviy moddalar bor, ulardan 60 tasi rakni chaqiradi. Chekish xalqum, ogʻiz boʻshligʻi, qiziloʻngach, oshqozon osti bezi, buyrak va siydik pufagi rakiga ham olib keladi.

Demak, zudlik bilan chekishni tashlash zarur! Chunki bu sizning umringizni uzaytiradi. Chekish inson umrini 15-20-yilga qisqartiradi. Jahon Sogʻliqni saqlash tashkilotining maʼlumotiga koʻra har yili 5 mln. aholi chekish sababli erta oʻlim topadi.

Siz chekishni tashlamoqchimisiz? Unda tezda  tamakini rad qilish kunini belgilang! Uydagi, ishdagi, mashinadagi barcha sigaret, kuldon, gugurt va boshqa vositalardan xolos boʻling. Uyingizda, mashinangizda chekishni man qiling.

Chekishdan oʻzingizni chalgʻitishga harakat qiling. Agar qattiq xumor sizni tark etmasa, kim bilandir gaplashishga yoki yoqimli biron bir ish bilan shugʻullanishga harakat qiling:

- birinchi kunlari odatiy kun tartibingizni oʻzgartiring;

- alkogolli ichimliklar ichmang;

- stressni kamaytirish uchun issiq vanna qabul qiling, jismonan faol boʻling, kitob oʻqing;

- koʻproq suv va sharbat iching;

- hisoblab koʻring, chekishni tashlaganingizdan beri qancha pul tejab qoldingiz va bu pulga oʻzingizga sovgʻa oling.

Tamakiga tobelikdan qutulish uchun shifokorga murojaat qiling.

Mutaxassis shifokor qaysi usul sizga toʻgʻri kelishini hal qiladi.    

Qiyinchiliklarga qarshi kurashing. Yodda tuting: koʻpchilik insonlar chekishni bir necha marotaba tashlashga harakat qilganlarida maqsadlariga erishadilar. Shu sabab, boʻshashmang, siz ham chekishni tashlashning uddasidan chiqasiz!

Yaqinlaringiz koʻmagiga ishoning. Tekshiruvlar shuni koʻrsatadiki, yaqinlar koʻmagi sizga katta yordam beradi. Yaqinlaringiz, doʻstlaringiz, hamkasblaringizga chekishni tashlamoqchi ekaningizni ayting, sizni qoʻllashlarini soʻrang. Ulardan sizning oldingizda chekmasliklarini iltimos qiling.

Xumori sizni bezovta qilmay qoʻygan kundan boshlab siz yuz foiz sogʻlom hayot sari qadam qoʻygan boʻlasiz. Bu sizning baxtingiz, farovon va obod turmush tarzingiz, mazmunli umringizdir.

Jumaboy YaVQAShEV,

tuman Salomatlik markazi direktori.

(Foto - http://www.dustlikbayrogi.uz)