Savol bering, javob qaytaramiz

Savol:  Aliment toʻlash toʻgʻrisidagi kelishuvni notarial tartibda tasdiqlash tartibi qanday?

Savolga 2-sonli tuman davlat notarial idorasi notariusi yordamchisi Shahnoza Bobojonova javob beradi:

– Aliment toʻlash toʻgʻrisidagi kelishuv (aliment miqdori, shartlari va toʻlash tartibi) aliment toʻlashi shart boʻlgan shaxs bilan aliment oluvchi oʻrtasida Oʻzbekiston Respublikasi Oila Kodeksining 130-moddasiga binoan tuziladi. Agar aliment oluvchi muomalaga layoqatsiz boʻlsa, kelishuv uning qonuniy vakili bilan tuziladi.

Aliment toʻlash toʻgʻrisidagi kelishuv yozma shaklda tuzilib, notarial tartibda tasdiqlanishi lozim. Notarial tartibda tasdiqlangan kelishuv ijro varaqasi kuchiga ega boʻladi.

Toʻlanadigan alimentlarning miqdorini taraflar mazkur kelishuvda belgilaydi. Voyaga yetmagan bolalarga aliment toʻlash toʻgʻrisidagi kelishuvga binoan toʻlanadigan alimentning miqdori aliment sud tartibida undirilganda bolalar olishi mumkin boʻlgan miqdordan kam boʻlmasligi kerak.

Alimentlar:

- aliment toʻlashi shart boʻlgan shaxsning ish haqi va (yoki) boshqa daromadiga nisbatan ulushlarda;

- vaqti-vaqtida pul bilan toʻlanadigan qatʼiy summada;

- bir yoʻla pul bilan toʻlanadigan qatiy summada;

- mol-mulk bilan yoki kelishuvda qayd etilgan boshqa usullarda toʻlanishi mumkin.

Aliment toʻlash haqidagi kelishuvda aliment toʻlashning turli usullarini birga qoʻshib qoʻllash nazarda tutilishi mumkin.

Savol:  Bola asrab olmoqchiman. Buning tartibi haqida maʼlumot bersangiz.

Bobur Sobirov, Amudaryo tumani.

Savolga Amudaryo tumani FHDYo boʻlimi inspektori Muborak Primbetova javob beradi:

– 2013-yili qonunchiligimizga kiritilgan oʻzgartirishlarga asosan farzandlikka olish faqat sud tartibida amalga oshiriladi. Buning uchun farzandlikka olish toʻgʻrisidagi ariza bilan farzandlikka olinayotgan bolaning yashash joyidagi fuqarolik ishlari boʻyicha tumanlararo, tuman, shahar sudiga murojaat qilinadi.

Sudning farzandlikka olish toʻgʻrisidagi hal qiluv qarori qonuniy kuchga kirgan kundan boshlab oʻn kun ichida FHDYo organi farzandlikka olingan bolaning tugʻilishi qayd etilgan dalolatnoma yozuviga zarur oʻzgartishlar kiritishi lozim.

Oʻn yoshdan oshmagan bolaning tugʻilgan joyi sudning hal qiluv qarori asosida Oʻzbekistan Respublikasi hududi doirasida oʻzgartirilgan boʻlsa, u holda farzandlikka oluvchi (lar)ning yashash joyidagi FHDYo organiga tiklangan dalolatnoma yozuvi qayd etiladi va yetti kun ichida dastlabki dalolatnoma yozuvi qayd etilgan FHDYo organiga uni bekor qilish haqida xabarnoma yuboriladi.

 (Foto - http://mehnatdarsi.uz)