OGOHLIKDA XOʻRLIK YOʻQ

Oʻtgan 2015-yilda dunyo miqyosida oʻtkazilgan reytingda Oʻzbekistonimiz eng oldingi tinch-osuda mamlakatlarning biri sifatida eʼtirof etildi. Bu bejiz emas, albatta.

Yurtimizning qaysi hududiga, qay mahalda yoʻlga chiqsak ham, xudoga shukr, hech narsadan xavfsiramaymiz. Har kim oʻz uyida oila aʼzolari bilan bexavotir yashaydi. Biroq xalqimizning "oʻz mulkingga oʻzing ogoh boʻl, qoʻshningni oʻgʻri tutma”, degan maqoli ham bejizga aytilmagan. Yaʼni beshala barmogʻimiz baravar boʻlmaganiday, ayrim tarbiyasi buzuq, hech qayerda ishlamay, lekin shohona yashashni  orzu qiladiganlar ham oramizda uchrab turadi. Ular oʻzgalar mulkini oʻzlashtirishga, shu yoʻsin osongina daromad topishga harakat qiladilar.

Buningdek koʻngilsiz hodisalar sodir etilishining oldini olishda tuman ichki ishlar boʻlimi huzuridagi qoʻriqlash boʻlinmasi  xizmati muhim ahamiyatga ega. Boʻlinmaning asosiy  faoliyati iqtisodiy va ijtimoiy ahamiyatga molik binolarni, davlat ahamiyatidagi obʼektlarni va xususiy xonadonlar, tadbirkorlik obʼektlarini qoʻriqlashdan iborat.

Jami 81 nafar xodim mehnat qiladigan boʻlinma ayni kunda 52 ta obeʼktlarni qoʻriqlashga olgan. Shuning 15 tasi xonadonlar, korxonalar va tadbirkorlik obʼektlari esa 37 tadir.

Oʻtgan yillar mobaynida boʻlinmamiz xodimlari oʻz xizmat vazifasini sidqidildan ado etganliklari tufayli mazkur obʼektlarda hech qanday notinchlik, koʻngilsiz hodisa sodir etilmadi.

Agar tumanimizdagi xususiy tadbirkorlar, xonadon egalari  obʼektlarining xavfsizligi taʼminlanishini istasalar, qoʻriqlash boʻlinmasi xizmatidan foydalanishlari mumkin. Buning uchun boʻlinmaga murojaat qilinadi va qoʻriqlash yuzasidan shartnoma tuziladi. Har kim oʻz mulkiga oʻzi ogoh boʻlsa, koʻpgina koʻngilsizliklarning oldi olinadi. Axir donolar ogohlikda xoʻrlik yoʻq, deb bekorga aytishmagan.

Ergash SAPIYaZOV,

tuman IIB huzuridagi qoʻriqlash boʻlinmasi texnik qoʻriqlash punkti boshligʻi, serjant.

(Foto - http://uzbekistonovozi.uz)