MUSTAQILLIK – BU XUKUK DEMAKDIR

Xalqimiz har yili  Oʻzbekiston Respublikasi davlat mustaqilligiga erishgan sanani muqaddas bilib, katta tantanalar bilan nishonlaydi. Ushbu qutlugʻ sana munosabati bilan bosib oʻtgan yoʻlimizni, amalga oshirgan ishlarimizni sarhisob qilib olamiz.

Mustaqillik - eng avvalo, oʻz taqdirimizni oʻz qoʻlimizga olish, oʻzligimizni anglash, milliy qadriyatlarimizni, urf-odatlarimizni tiklash, hammamiz uchun moʻʼtabar shu zaminda, har bir xonadonda tinchlik-osoyishtalikni barqaror qilib, baxtiyor va hur yashash imkonini berdi.

Biz uchun mustaqillik - Allohning oʻzi el-yurtimizga inʼom etgan tabiiy boyliklarga egalik qilish, xalqimiz qudrati, salohiyati, aql-u zakovatiga tayanib, Oʻzbekistonda yashayotgan har bir inson, har bir oila uchun munosib hayot qurish, kelajak avlodlar uchun ozod va obod Vatan qoldirish imkonini berdi.

Mustaqillik yillarida sud-huquq islohotlari doirasida notariat, advokatura, FHDYo organlari faoliyatini har tomonlama qoʻllab-quvvatlashga alohida eʼtibor qaratildi. Ushbu yoʻnalishdagi chora-tadbirlar fuqarolar va yuridik shaxslarga malakali yuridik yordam koʻrsatishga asos boʻlayotir.

1998-yil "Oila yili” deb nomlandi, shu munosabat bilan maxsus davlat Dasturi hayotga tatbiq etildi. Xuddi shu yili Oila Kodeksi kuchga kirdi. 2002-yilda Kodeksning 17-moddasiga nikohlanuvchi shaxslarni davlat sogʻlikni saqlash muassasalarida bepul tibbiy koʻrikdan oʻtkazishni koʻzda tutuvchi qoʻshimcha kiritildi. Unga asosan hukumatimizning 2003-yil 25-avgustdagi 365-sonli qarori bilan "Nikohlanuvchi shaxslarni tibbiy koʻrikdan oʻtkazish toʻgʻrisida”gi nizom tasdiqlandi. Bu esa tibbiyot muassasalari qatori FHDYo organlari zimmasiga ham alohida masʼuliyat yukladi. Ahamiyatlisi, bu kabi saʼy-harakatlar sogʻlom zurriyodning dunyoga kelishiga xizmat qilmoqda.

Keyingi yillarda FHDYo organlari faoliyatini takomillashtirishga ham jiddiy eʼtibor qaratilmoqda. Fuqarolik holati dalolatnomalarini qayd etish qoidalari, fuqarolik holati dalolatnomalarini yozish (FHDYo) organlarida ish yuritish tartibi haqidagi yoʻriqnoma, Fuqarolik holati dalolatnoma yozuvlarining shakllari va ularni toʻldirish boʻyicha qoidalarning qabul qilinishi, "Fuqarolik holati dalolatnomalarini yozish organlari toʻgʻrisida”gi nizomning yangi tahrirda ishlab chiqilishi, FHDYo organlari masʼul xodimlariga maxsus unvonlar, yangi martaba darajalarining berilishi sohaga boʻlgan eʼtiborning yorqin namunasi, deya eʼtirof etish mumkin.

Har bir xalq oʻz tarixiy ildizlaridan oziqlanib, ravnaq topadi. Shu maʼnoda mustaqillik tarixini oʻrganishimiz bizni quvvatlantiradi, yangi-yangi marralar sari yetaklaydi. Istiqlolning 1991-yil 1 sentyabrdan keyingi shonli tarixini mulohaza qilish – xalq sifatida bugungi farovon turmushimizga erishish zamirida qanday mashaqqatlar yotganini, qanday murakkab yoʻllarni matonat bilan bosib oʻtganimizni esdan chiqarmaslikka, tinchlik-xotirjamligimizning qadriga yetishga undaydi.

Sanobar XOLBOYeVA,

tuman FHDYo boʻlimi mudirasi.

(Foto-http://sharqyulduzi.uz)