AJDODLAR ORZUSI

Paygʻambarimiz (s.a.v.) hadislarining birida tinchlik-xotirjamlik eng katta neʼmat ekanligini taʼkidlab shunday deganlar: "Ikki neʼmat borki, koʻpchilik insonlar uning qadriga yetmaydilar. U – xotirjamlik va sihat-salomatlik” (Tabaroniy rivoyati).

Xalqimizning yang yaxshi koʻrgan va eng koʻp takrorlaydigan duosi "Iloho, xonadonlarimizni, tinch va osoyishta yurtimizni obod qil”, degan duodir.  Dono xalqimizning "Qoʻshning tinch – sen tinch”, "Bir kun urush boʻlgan joydan qirq kun baraka ketadi”, "Tinchliging – hurliging” kabi maqollarida ham tinchlik qanchalik bebaho neʼmat ekani aytiladi. Oqsoqollar nasihatida, onalar aytgan allalarida bejizga tinchlik-xotirjamlik koʻp tilga olinmaydi.

Tinchlik qaror topgan yurtda xotirjamlik hukm suradi, jamiyatda har tomonlama yuksalish va rivojlanish roʻy beradi. Odamlarning oʻzaro bir-birlariga boʻlgan ishonch va sadoqatlari, mehr va muruvvatlarining samimiy boʻlishi ham asosan xotirjamlikka bogʻliqdir. Demak, dunyoda hayotning bir maromda davom etishi, xalqning Haq taolo buyurgan ishlarini mukammal va xotirjam ado etishlari uchun tinchlik va osoyishtalik lozim. Yaratgan Parvardigor Qurʼoni karimda ana shu tinchlikni saqlash va qadrlash vazifasini inson zimmasiga yuklab, Islom dini tinchlikni targʻib qilishini, shaytoniy yoʻllarga ergashmaslik lozimligini taʼkidlab, shunday deydi,  "Ey, imon keltirganlar! Yoppasiga itoatga kirishingiz va shaytonning izidan ergashmangiz! Albatta, u sizlarga aniq dushmandir” ("Baqara” surasi, 208-oyat).

Qurʼoni karim taʼlim beradiki, har qanday shakldagi zulm va zoʻravonlik islom aqidasiga tubdan qarama-qarshidir va bironta musulmon ana shunday jinoyatni sodir etishi mumkin emas. Bundan tashqari, musulmonlar Pavardigorlari oldida boshqa odamlarni jinoyat sodir qilishdan qaytarishga masʼuldirlar. Har bir imonli kishining burchi – yer yuzida buzgʻunchilikka yoʻl qoʻymaslik, dunyoda farovonlik va osoyishtalikni qaror toptirish uchun kurashishdan iborat.

Alloh rahmatiga musharraf boʻlsinlar, Yurtboshimiz I.A.Karimov oʻz hayotini tinchlik yoʻliga tikib yashagan xalq qahramoni edilarki, uning har bir soʻzi, qilgan ishlari biz uchun ibrat maktabidir.

Rajabboy Habibullayev,

"Hoji Eshon” jomeʼ masjidi imom-xatibi. 

(Foto - http://karmanaovozi.uz)