Savol bering, javob qaytaramiz

Savol: – Oila qurganimizga yetti yil boʻldi. Turmushimiz yaxshi. Ammo farzandli boʻlmadik. Qaynonam oʻgʻlimni boshqasiga uylantiraman, deb nikohimizni bekor qilishimizni soʻradi. Lekin biz turmush oʻrtogʻim bilan bola asrab olishga qaror qildik. Farzandlikka olish tartibi qanday?

Munira.

Javob: – Farzandlikka olish Oila, Fuqarolik Kodekslari, Vazirlar Mahkamasining 2016-yil 14-noyabrdagi 387-sonli Qarori bilan tasdiqlangan Fuqarolik holati dalolatnomalarini qayd etish qoidalari, shuningdek, Adliya vazirligining 2013-yil 31-dekabrdagi 400-mx-sonli buyrugʻi bilan tasdiqlangan «Fuqarolik holati dalolatnomalarini yozish organlarida ish yuritish tartibi toʻgʻrisida»gi yoʻriqnomada belgilangan tartibda amalga oshiriladi.

2013-yili qonunchiligimizga kiritilgan oʻzgartirishlarga asosan farzandlikka olish faqat sud tartibida amalga oshirilmoqda.

Buning uchun farzandlikka olish toʻgʻrisidagi ariza bilan farzandlikka olinayotgan bolaning yashash joyidagi fuqarolik ishlari boʻyicha tumanlararo, tuman, shahar sudiga murojaat qilinadi. Farzandlikka olish toʻgʻrisidagi ishlar Fuqarolik protsessual Kodeksida nazarda tutilgan qoidalar boʻyicha alohida ish yuritish tartibida, farzandlikka oluvchilar, vasiylik va homiylik organlari vakili, shuningdek, prokuror ishtirokida sud tomonidan koʻrib chiqiladi.

Sudning farzandlikka olish toʻgʻrisidagi hal qiluv qarori qonuniy kuchga kirgan kundan boshlab, oʻn kun ichida FHDYo organi farzandlikka olingan bolaning tugʻilishi qayd etilgan dalolatnoma yozuviga zarur oʻzgartirishlar kiritishi lozim. Farzandlikka olishni rasmiylashtirish uchun FHDYo organiga sudning hal qiluv qaroridan koʻchirma, farzandlikka olinuvchining tugʻilganlik haqidagi guvohnomasi, shuningdek farzandlikka oluvchilarning shaxsini tasdiqlovchi hujjatlari taqdim etiladi. Farzandlikka oluvchilar ikki yoki undan koʻp bolani bir vaqtda farzandlikka olgan hollarda har bir bola uchun alohida sudning hal qiluv qarori taqdim etilishi, agar ushbu masalada sud tomonidan bitta hal qiluv qarori qabul qilingan boʻlsa, mazkur hal qiluv qarorining nusxalari farzandlikka olinayotgan bolalarning soniga mutanosib miqdorda taqdim etilishi hamda har bir qarorga alohida kirim va ijro haqida belgi qoʻyilishi lozim.

Savolga tuman FHDYo boʻlimi mudirasi S.Xalbayeva javob berdi.

Savol: – Oʻgʻlim 11 yoshda. Baʼzi sabablarga koʻra, oʻz vaqtida unga tugʻilganlik haqidagi guvohnoma olmagan edik, endi olmoqchimiz. Buning tartibi qanday?

Sarvar Matmuratov.

Javob: – Oʻn olti yoshgacha boʻlgan bolaning tugʻilishini qayd etish uchun FHDYo organiga tugʻilishni qayd etish muddatini oʻtkazib yuborganlik sabablari koʻrsatilgan ariza (17-ilovaga muvofiq) va quyidagi hujjatlar taqdim etiladi:

– bolaning tugʻilganligi haqida tibbiy maʼlumotnoma yoki bolaning tugʻruqxonadan tashqari joylarda va tibbiy yordamsiz tugʻilganligini tasdiqlovchi dalolatnoma yoki fuqarolik sudning hal qiluv qarori;

– bolaning sogʻligi toʻgʻrisida maʼlumotnoma;

– bolaning taʼlim olayotganligi toʻgʻrisida maʼlumotnoma;

– tegishli FHDYo arxividan ushbu bolaga nisbatan tugʻilganlik haqida dalolatnoma yozuvi qayd etilmaganligi toʻgʻrisida maʼlumotnoma (71-ilova).

Savolga tuman FHDYo boʻlimi inspektori M.Primbetova javob berdi.