SAVOL BERING, JAVOB QAYTARAMIZ

Savol: – Oʻzboshimchalik bilan qurilgan imoratga mulk huquqi eʼtirof etilishi mumkinmi?

Javob: – Fuqarolik kodeksining 212-moddasi boʻyicha Qonun hujjatlarida belgilangan tartibda qurilish maqsadlari uchun ajratilmagan yer uchastkalarida, shuningdek, imorat qurish uchun zarur ruxsatnoma olmasdan yoki arxitektura va qurilish normalari, qoidalarini jiddiy buzgan holda qurilgan uy-joy, boshqa bino, inshoot yoki oʻzga koʻchmas mulk oʻzboshimchalik bilan qurilgan imoratdir.

Oʻzboshimchalik bilan imorat qurgan shaxs unga mulk huquqini ololmaydi. Bu shaxs qurgan imoratini tasarruf etishga — sotishga, hadya etishga, ijaraga berishga, imoratga nisbatan boshqa bitimlar tuzishga haqli emas.

Shaxs oʻziga qarashli boʻlmagan yer uchastkasida oʻzboshimchalik bilan imorat qurgan boʻlsa, uning bu imoratga nisbatan mulk huquqi sud tomonidan basharti, mazkur uchastka shu shaxsga qurilgan imorat uchun belgilangan tartibda beriladigan boʻlsa, eʼtirof etilishi mumkin. Biroq oʻzboshimchalik bilan qurilgan imoratning saqlab qolinishi boshqa shaxslarning huquqlari va qonun bilan qoʻriqlanadigan manfaatlari buzilishiga sabab boʻlsa, yoxud fuqarolarning hayoti va sogʻligʻiga xavf tugʻdirsa, yuqorida koʻrsatilgan shaxslarning oʻzboshimchalik bilan qurgan imoratiga nisbatan mulk huquqi eʼtirof etilishi mumkin emas.

Cavol: – Ishga joylashish uchun qoʻshimcha kafolatlar kimlarga berilishi mumkin?

Javob: – Mehnat kodeksining 68-moddasi boʻyicha ijtimoiy himoyaga muhtoj, ish topishda qiynalayotgan va mehnat bozorida teng sharoitlarda raqobatlashishga qodir boʻlmagan shaxslarga, shu jumladan, oʻn toʻrt yoshga toʻlmagan bolalari va nogiron bolalari bor yolgʻiz ota, yolgʻiz onalarga hamda koʻp bolali ota-onalarga, oʻrta maxsus, kasb-hunar taʼlimi muassasalarini tamomlagan yoshlarga, shuningdek oliy oʻquv yurtlarining davlat grantlari asosida taʼlim olgan bitiruvchilariga, Oʻzbekiston Respublikasi Qurolli Kuchlari safidan muddatli harbiy xizmatdan boʻshatilganlarga,nogironlarga va pensiya yoshiga yaqinlashib qolgan shaxslarga, jazoni ijro etish muassasalaridan ozod qilingan yoki sud qaroriga koʻra tibbiy yoʻsindagi majburlov choralariga tortilgan shaxslarga, odam savdosidan jabrlanganlarga ishga joylashishda qoʻshimcha kafolatlar beriladi.

Savollarga tuman prokurorining katta yordamchisi, 3-darajali yurist D.Allambergenov javob berdi.

Savol: – Shartnoma asosida taʼlim olayotgan oliy oʻquv yurti talabasi taʼlim kreditini bir yoʻla toʻrt yilga olishi mumkinmi? Bu kreditning yillik foizi qancha?

Javob: – Eng kam oylik ish haqi miqdori yoki oʻqish uchun toʻlov tariflari oʻzgarishi munosabati bilan, "Oliy va oʻrta maxsus, kasb-hunar taʼlimi muassasalarida oʻqitishning toʻlov-kontrakt asosida mutaxassislar tayyorlash boʻyicha” joriy oʻquv yilidagi shartnoma har oʻquv yili uchun alohida tuziladi. Yillik foizi Markaziy Bankning qayta moliyalashtirish stavkasidan oshmagan holda belgilanadi.

Shu sababli, taʼlim krediti bir yoʻla 4-yilga berilmaydi.

Savol: – Yangi imorat qurish uchun pensionerlar kredit olishi mumkinmi?

Javob: – Markaziy bankning koʻrsatmasiga asosan kredit oʻn sakkiz yoshga toʻlgan va muomala layoqatiga ega, doimiy yashash joyida roʻyxatdan oʻtgan, shuningdek oʻz faoliyati natijasida olinadigan daromadlar, pensiya hamda boshqa daromadlarga ega boʻlgan Oʻzbekiston Respublikasi fuqarolariga beriladi. Agar pensioner yangi imorat qurish uchun kredit oladigan boʻlsa, pensiya miqdori va taʼminot manbai olingan kreditni qaytaruvchanlik, toʻlovlilik qobiliyatiga ega boʻlishi lozim. Tumanimizda uy-joy qurilishi boʻyicha jismoniy shaxslarni kreditlash "Qishloq qurilish bank”ning Amudaryo tumani mini banki orqali amalga oshirilmoqda.

Savollarga «Agrobank» ATB tuman filiali boshqaruvchisi vazifasini bajaruvchi K.AYTBOYeV javob berdi.