Jayxun ilhomlari

NAVROʻZ KELIB...

Qisqa kunlar boʻldi uzun,

Koʻk maysalar yerga husn,

Hamma hursand, shodon bugun,

Navroʻz kelib, Navroʻz kelib.

Pishmoqdadir sumalaklar,

Qizlar taqdi tolbargaklar,

Koʻkda uchar gʻoz, oʻrdaklar,

Navroʻz kelib, Navroʻz kelib.

Sovuq endi bizdan qochar,

Dehqon yerga urugʻ sochar,

Bogʻ-u rogʻlar chiroy ochar,

Navroʻz kelib, Navroʻz kelib.

Yurtimizda toʻy-tantana,

Oʻynaydirmiz yana-yana,

Tomosha zoʻr, koʻring mana,

Navroʻz kelib, Navroʻz kelib!

Saʼdulla Xoʻjaniyozov.

Xush kelding

Baliq dumi qoʻy burniga duch keldi,

Bahor boshi – qutlugʻ Hamal burj keldi.

Yerga, koʻkka haroratu kuch keldi,

Xush kelding-a, Navroʻzim- a, xush kelding!

Koʻmmoqchi boʻlganlar ketdi koʻmilib,

Sinmay oʻtding toʻfonlardan egilib.

Xurofotdan maʼrifatga evrilib

Xush kelding-a, Navroʻzim- a, xush kelding!

Jonga yaqin elning qadim bayrami,

Sumalak, koʻk boʻrak, patirning taʼmi,

Istiqlol – ming istiqbolning qadami,

Xush kelding-a, Navroʻzim- a, xush kelding!

Unutilmas qishki shirin ertaklar,

Gul, mevaga jahd qilmoqda kurtaklar,

Shod kezinar pirlar, yoshlar, goʻdaklar

Xush kelding-a, Navroʻzim- a, xush kelding!

Tilagimiz – tinchlik butun dunyoga!

Olam toʻlsin joʻshqin qoʻshiq, navoga,

Shon-shavkatga, omonlikka, ziyoga,

Xush kelding-a, Navroʻzim- a, xush kelding!

Tursunboy ABDULLAYeV.

GOʻZALLIK KELTIRGAN  KUNLAR

Benazir goʻzallik keltirgan kunlar

Taftidan tarovat topadi gullar.

Jonlarga jonlangan nurlar beradi,

Qonlarga uygʻongan kuchlar kiradi.

Nihollar oʻsadi yellarda oʻynab,

Bir kuni barq urar barglar kuylab!

Aftidan, rassomdek tabiat tagʻin

Turfarang ayladi togʻlar etagin.

Yaylovni yangilab, bezab tashladi,

Dashtlarga kashtalar tikib tashladi,

Beqiyos boy chiroy baxsh etgan faslim,

Tuhfadan mamnun va minnatdor naslim.

Aslimga qaytargan vasling – yaxshilik,

Bastimga – qaddimga tushgan asllik.

Samoda havolab uchgan qushlar ham...

Bunchalik zoʻr boʻlmas totli tushlar ham!

Bahorim, diyorim dostonidasan,

Orzusi yogʻduli osmonidasan.

Qonimda qoʻshiq boʻl, qoʻshayin kuyga,

Jaranglab kirib bor har bitta uyga!

Jumaboy Hidoyatov.

Muqaddas soʻz kelayotir

Mavsumlari ming xil rangda, ming xil jilva,

Oro bilan yurtga Navroʻz kelayotir.

Kelsa, faqat quchogʻida barakasi –

Elga shoh yil, elga shohroʻz kelayotir.

Turnalarning qanotida salomlari,

Falaklarda men kutgan iz kelayotir.

Boʻlsa faqat yuragida andishasi –

Elim kutgan muqaddas soʻz kelayotir.

Qadriyatlar bezavoldir bu oʻlkada,

Beshiklarga ohang, kuylar kelayotir.

Qirq kokili belin quchgan sanamlarga,

Sadoqatdan qoʻshiq, toʻylar kelayotir.

Bogʻlarimni bahor siylab gullar bilan,

Dimogʻimga ifor – boʻylar kelayotir.

Demang meni, sogʻinch tuygan bitta shoir,

Yuragimga shirin oʻylar kelayotir.

Zebolanib yurtga Navroʻz kelayotir.

Elga shoh yil,  elga shohroʻz kelayotir.

Guloyim BEGJANOVA,

11-sonli maktab oʻqituvchisi.

Bahor

Keldi bahor chiroyin ochib,

Dalalarga yashil rang sochib.

Quyosh nuri bogʻ-rogʻlarimni,

Shalolalar yuvdi togʻlarni.

Oʻrik, olma, olcha, behilar,

Chaman-chaman boʻlib gulladi.

Qaldirgʻoch-u chugʻurchuqlar,

Samolarda shodon sayradi.

Bosh koʻtardi qarang, maysalar,

«Shukur», – deydi koʻrib keksalar.

Muncha goʻzal yurtim bahori,

Har goʻshada shodlik ifori.

Goʻzaloy NURIMBETOVA,

56-maktab oʻquvchisi.

Quvonchim

Osmonlarda kamalak,

Qozonlarda sumalak.

Quvonchlarim bir jahon,

Elga Navroʻz muborak!

Navroʻz – Vatanning naqshi,

Kuylar hofiz-u baxshi.

Varraklarning ketidan,

Yugurmoq qanday yaxshi.

Varragim uch, uchaver,

Yuksaklarni quchaver.

Samolarning bagʻridan,

Dilga quvonch sochaver.

Navroʻz bilan qoʻllashib,

Mehnat bilan doʻstlashib.

Istiqbolni quchamiz,

Bahordayin gullashib.

Umida Abdullayeva, Amudaryo akademik litseyi oʻquvchisi.

NAVROʻZ

Sumalakni qozonlarda qaynatib,

Sozlar chalib, qiz-yigitni oʻynatib.

El-u yurtning koʻngillarin yayratib

Xush kelding bahorim, xush kelding, Navroʻz!

Ana qarang, soz qoʻlida, kuy kuylar,

Jam boʻlishib, ahli elim jam oʻynar.

Har goʻshada xalqim xursand toʻy toʻylar,

Xush kelding bahorim, xush  kelding Navroʻz!

Dehqon bobo dalasiga sochayotir don,

Har uyning toʻrida ochiq dasturxon.

Tandirlarda toʻlib yopiladi non,

Rizq-u roʻzga poydor, kelding gul Navroʻz!

Aydos Ibodullayev.

 Bahorni sogʻinib

Qiynar meni tinmasdan,

Bedor tun, bekor tunlar.

Sogʻinaman bahorni,

Oʻtsaydi tezroq kunlar,

Bahor kelsaydi tezroq,

Bahor, kelgin yaqinroq.

Boychechaklar armonda,

Sendan hali darak yoʻq.

Sumalaklar qozonda,

Sensiz qalbda quvonch yoʻq.

Seni sogʻindim koʻproq,

Bahor, kelgin yaqinroq.

Yurakda kulgan chechak –

Bahor, sen menga kerak.

Koʻzimdagi quvonchim.

Sen bilan orzu, tilak,

Yomgʻiring dilga mador,

Hidlaring ham betakror.

Kelding, barcha shod kuldi,

Koʻngillar obod boʻldi.

Kamalakning jilosi

Sheʼrimga qanot boʻldi.

Bahor, aytar gapim bor,

Seni sogʻindi Dildor.

Dildora RAJABOVA.

YaNA IZLAB  KELIBSAN,  BAHOR

Sogʻingandim men seni koʻpdan,

Seni izlab kezdim har nahor.

Koʻp izladim togʻ-u qirlardan,

Bugun yana birgamiz, bahor.

Xush kelibsan, gul fasli – koʻklam,

Yasharibdi tabiat ming bor.

Ogʻushingda gul ochar oʻlkam,

Yashillanib kelibsan, bahor.

Irmoqlarda ishqning dostoni,

Chechaklarga burkar har yonni.

Men sevgan gul – Oʻzbekistonni,

Yana topib kelibsan, bahor.

Chinoroy OʻRINBOYeVA.

Sumalak

Doshqozonda sumalagim qaynaydi,

Atrofida onajonlar oʻynaydi.

Bolajonlar quvonishib, shod boʻlib,

To tonggacha kuy-qoʻshiqlar yangraydi.

Sumalak saylida aytilgan tilak,

Oʻng kelib, albatta baxtlar kulajak.

Ezgu niyatlardan tozargan dillar,

Orzu manziliga albat yetajak!

Jamila YaNGIBOYeVA.

Betakror goʻsham

Bugungacha osmonni quchib yashadim,

Koʻklarga, samoga uchib yashadim.

Mayli, deb baridan kechib yashadim,

Seningdek makonni koʻrmadim hech ham,

Gullarga burkangan betakror goʻsham.

Suvingni quvonchdan zavqlanib ichib,

Har tong faxr ila qadamim ildam,

Turli manzillarga kun ora koʻchib,

Seningdek makonni koʻrmadim hech ham,

Gullarga burkangan betakror goʻsham!

Nilufar OTAJONOVA, Amudaryo akademik litseyi oʻquvchisi.

Bahor keldi yurtimga

Barcha quvnoq, shod-xurram,

Shundayin goʻzal oʻlkam.

Jonlanar saxiy koʻklam,

Bahor keldi yurtimga!

Bobo dehqon ish boshlar,

Yangi kunni olqishlar.

Har kuni toʻy-u hashar,

Bahor keldi yurtimga!

Mehnat fasli boshlanar,

Yerga urugʻ tashlanar.

Keksalar ham yosharar,

Bahor keldi yurtimga!

Iroda YeRDOShEVA,

38-sonli maktab oʻquvchisi.

Yangi kun

Navroʻz keldi yurtimga,

Boychechaklar ochildi.

Qushlar sayrashni boshlab,

Quyosh nuri sochildi.

Navroʻz keldi yurtimga,

Shodon kutib olaylik.

Sumalaklar pishirib,

Yangi kunni boshlaylik!

Shahlo QUROLOVA,

62-maktab oʻquvchisi.