KULGULARING DUNYoNI TUTSIN, BOLAJON!

Agar mendan ayol umrining eng goʻzal lahzasini tasvirlab berishni soʻrashsa, albatta  hech ikkilanmay, bolasini bagʻriga bosganicha alla aytayotgan paytini chizar edim.

Bagʻrida jigargoʻshasining taftini his qilganicha mehri-muhabbati qorishgan ilohiy  qoʻshiq – allaga umri davomchisini inʼom etgani uchun Yaratganga shukronasini, onalikday ulugʻ baxtga musharraf boʻlganidan baxtiyorligini qoʻshib aytadi, farzandi qalbiga allasi orqali eng ezgu orzularini singdirishga intiladi.

Ha, farzandlarimiz umrimiz davomchilari, ertanggi kunimiz egalari, goʻyoki xonadonlarimizni yoritib turuvchi shamchiroq, hayotimiz mazmuni. Shu bois ham koʻzi qarogʻimizda asraymiz bolamizni. Bu borada davlatimiz gʻamxoʻrliklarini aytmaysizmi?!

Dunyoga kelgan murgʻak goʻdak emin-erkin, bexavotir onasi bagʻrida ulgʻayishga haqli. Biroq... biroq, dunyodagi barcha onalar ham farzandiga ana shunday baxtni bera olishga qodirmi?

Afsus va nadomatlar boʻlsinki, dunyoning turli hududlarida sharoitlar turlicha, koʻz qarashlar turlicha. Ayrim davlatlarda yoshlar oila qurish, farzand koʻrishni oʻzlariga ortiqcha tashvish,  deya hisoblashadi. Ayrim davlatlarda esa ota-onalar umid bilan dunyoga keltirgan farzandining  qornini toʻygʻazish uchun hatto oʻz tanasining ayrim aʼzolarini sotishga ham majbur boʻlmoqdalar. Oddiygina bir misol: Yamanda har 10 daqiqada 5 yoshdan kichik bir bola yomon sharoitda yashagani, toʻyib ovqat yemagani uchun halok boʻlmoqda, deya habar beradi BMTning gumanitar masalalarni muvofiqlashtirish boshqarmasi. Bu mamlakatda 19 mln.ga yaqin aholi ijtimoiy himoyaga muhtoj. 10 mln.dan ortiq odam nochorlikda, 8 mln.dan ortiq odam ichimlik suvi tanqisligidan qiynalib yashamoqda.

Dunyoning 22 davlatida yashovchi 6 yoshdan 15 yoshgacha boʻlgan 25 mln.dan koʻproq bola qurolli ixtiloflar tufayli maktabga taʼlim olgani bora olmayapti.

Uzoqqa bormay, qoʻshni mamlakat – Afgʻonistondagi qancha bolalarning naqadar ogʻir ahvolda, maktablarda oʻqib, ilm olishni faqat orzu qilib yashayotganini esga olsak, yurtimizdagi tinch-osoyishta turmushning, bolalar kelajagi uchun qilinayotgan gʻamxoʻrliklarning qadri nechogʻlik buyuk ekanligini teranroq anglaymiz. Shunday qutlugʻ va jannatmakon yurtda tugʻilganimizga qayta-qayta shukrona aytamiz.

Axir yurtimizda har yili bolajonlarimizning yayrab-quvnab ulgʻayishlari uchun qanchadan qancha maktabgacha taʼlim muassasalari, zamonaviy ilm fan asoslarini puxta egallashlari uchun qanchadan qancha taʼlim maskanlari qurilayapti, mavjudlari taʼmirlanib, zamon talabiga moslashtirilayapti. Bu ishlarga, onalik va bolalikni muhofaza qilishga qanchadan qancha mablagʻlar sarflanayapti. Ahil oilada sogʻlom farzandlarning dunyoga kelib, kamol topishi uchun barcha sharoitlar yaratilayapti.

Onalik va bolalikni muhofaza qilish borasida mamlakatimizda amalga oshirilayotgan ishlarni mintaqamizdagi koʻpgina davlatlar namunaviy model sifatida qabul qilishayotganining oʻziyoq davlatimizning bu boradagi saʼy-harakatlari nechogʻlik yuksakligini koʻrsatadi.

Bolalar huquqlari bir qancha qonun va qonunosti huquqiy-meʼyoriy hujjatlarda ham oʻz aksini topgan.

Baxtli bolalikdan mamnun-u masrur bolajonlarimizga har yili 1-iyun – Xalqaro bolalarni himoya qilish kuni munosabati bilan alohida hurmat-ehtirom koʻrsatiladi. Butun mamlakatimizda turli koʻngilochar tadbirlar, bolalar tomoshalari tashkil etiladi, dunyoni bolalarga bergimiz keladi, goʻyo.

Boisi sen kulsang, dunyo kuladi, bolajon! Sening begʻubor va shodon kulgularing dunyoni tutsin, tinchlik degan aziz neʼmatning qadrini olamga yoysin!

Oygul RAJABOVA.

(Foto - OʻzA)