ELIM, DEB YaShAGAN INSONNI EL UNUTMAYDI

"Agar ketganingni bironta odam sezmasa, demak, u davrada sen hech kim emassan”.

Mashhur faylasuf aytganiday  kimningdir nainki davradan, balki hayotdan ketgani ham boshqalarga unchalik sezilmaydi, u haqdagi xotiralari ham tezda unutiladi. Aksincha, yana bir toifa odamlar borki, ularning hayotdan ketishi butun xalq uchun ogʻir yoʻqotish boʻladi, bunday kishilar koʻngillarda ezgu ishlari bilan abadiy yashaydi.

Tumanimizning sobiq hokimi, iqtisod fanlari nomzodi Rajabboy Yoʻldashev, taʼbir joiz boʻlsa, ana shunday odamlar sirasidan edi.

Men avval, 1996-yildan tuman Madaniyat boʻlimi mudiri, 2011-2012-yillarda "Nuroniy” jamgʻarmasi tuman boʻlinmasi raisi, keyinchalik bir yil "Boʻston” mahalla fuqarolar yigʻini raisi sifatida Rajabboy Yoʻldashev bilan koʻp bora suhbatlashganman, xizmat lavozimimga doir muammo, masala va takliflar yuzasidan murojaat qilgan vaqtlarimda u kishi doimo diqqat bilan quloq solib, eʼtibor, amaliy yordamlar bergan.

Rajabboy Yoʻldashev korxona, tashkilotlar rahbarlariga yigʻilishlarda doimo "dardingizni ichingizda yigʻib yurmang, muammo boʻlsa, dadil oʻrtaga tashlang, birgalashib yechishga harakat qilamiz”, derdi. Qabuliga kirgan odam bilan xoh u katta yo kichik boʻlsin, albatta oldiga peshvoz chiqib koʻrishib, omonlik soʻrashib, keyin ish yuzasidan gaplashardi. Qaysi sohaga doir majlis boʻlsa-da, u kishi ishtirokchilarning deyarli barchasini tanir, soʻzi orasida zaldagilarga baʼzan otini aytib murojaat qilar, koʻrilayotgan masala yuzasidan fikrini soʻrar yo avvallari yoʻl qoʻyilgan biron kamchilikni qanday bartaraf etganiga qiziqardi.

Rajabboy Yoʻldashev tumandagi barcha fermerlarni, tajribali dehqonlarni, har bir xoʻjalikdagi ekin maydonlarni ham yaxshi bilardi, falon otizda bunday boʻlibdi, falon otizning ekini chanqab turibdi, deb tanbeh berardi. Shu barobarida mehnatni qadrlashni ham joyiga qoʻyardi.

U kishi kamtarin, odamgarchilikli va shunday fidoyi va yuksak aql-zakovat egasi edi.

Adashmasam, bu voqea 2012-yilda boʻlgan edi. 9-may kuni Xotira bogʻida Xotira va qadrlash kuniga bagʻishlangan tantanali yigʻilishga toʻplangan edik. Rajabboy Yoʻldashev Ikkinchi jahon urushi faxriylari bilan birma-bir koʻrishib, omonlik soʻrashib chiqdi. Shunda "Bogʻ” mahallasida yashovchi faxriy otaxonning sogʻligida muammosi boʻlgani uchun yonida hamrohlik qilib kelgan turmush oʻrtogʻiga:

– Otamizni oʻgʻillariga ham ishonmay oʻzingiz yetaklab kelibsiz-da, onaxon. Rahmat sizga, otamizni asrang, ularni qancha eʼzozlasak, shuncha kam, – dedi.

Onaxon cholining sogʻligi yaxshi emasligini, agar yoʻllanma berishning  iloji boʻlsa, salomatligini tiklashga olib borishini aytdi.

Shunda hali otaxonning qoʻlini qoʻyib yubormay turib, Rajabboy Yoʻldashev meni chaqirdi (Men u paytda "Nuroniy” jamgʻarmasi tuman boʻlinmasini boshqarayotgan edim).

– Onaxonning iltimosini bajara olamizmi? – dedi menga kulib. Men "albatta”, deb javob berdim.

Xullas, ikki-uch kunning ichida urush faxriysi Yoʻldosh Ortiqov va turmush oʻrtogʻiga sihatgohga yoʻllanmani olib borib berib, bu haqda yoshulliga kirib aytganimda, quvonib, menga qayta-qayta rahmat aytgan. Oʻylab koʻring-a, azizlar, yelkasida butun bir Amudaryoday ulkan tuman tashvishi turgan hokimning  urush faxriysiga shunchalik eʼtiborini nima deb atash  joiz? Bu – Odamgarchilikmi? Yurtdoshlariga fidoyilikmi, hurmat-eʼtibormi? Yoʻq, Rajabboy Yoʻldashevga bu taʼriflarning barchasi ham kamlik qiladi. Chunki u kishining doim fikri-yodi shu tuman, mehnatkashlar tashvishi bilan band boʻlardi, shu el tashvishi bilan boʻlib, oʻzini oʻylamasdi, halovat neligini bilmasdi.

2012-yil kuzida tumanimizga "Nuroniy” jamgʻarmasi Qoraqalpogʻiston Respublikasi boʻlimi raisi Jalil ogʻa bilan davlat arbobi, uzoq yillar respublikamizga rahbarlik qilgan Qallibek Kamolovlar paxta yigʻim-terimi munosabati bilan tashrif buyurishdi.

Mehmonlarni Rajabboy Yoʻldashev bilan Amudaryo ponton koʻprigi oldida kutib oldik. Birga ovullarni aylandik, fermerning dala shiyponida tushlik qildik. Ularning suhbatiga guvoh boʻlib Rajabboy Yoʻldashevni nafaqat amudaryoliklar, balki butun Respublikadagi taniqli odamlar hurmat qilishini his qilganman.

Amudaryo tumani ravnaqi, el farovonligi yoʻlida jonini ayamay mehnat qilgan, xalqining yuragidan chuqur joy olgan, mehr-muhabbatini qozongan Rajabboy Yoʻldashevning hayotdan bevaqt ketganligi har bir koʻngilda armon boʻlib qoldi.

Hayotligida oʻz mehnatlari bilan oʻziga haykal qoʻyib ketgan tumanimiz rahbarini qutlugʻ Ramazon hayiti kunlarida barchamiz  esga olib, ruhi pokiga duolar oʻqiymiz. Elim, deb yashagan insonni el hech qachon unutmaydi.

Gulmirza NURMATOV, mehnat faxriysi.