EHTIROMGA SAZOVOR AYoL

Toʻyxat oʻrnida

Xonimjon opa Rajabova 60 yoshga kiribdi. Nazarimda opa endi kuch-qudratga toʻlgan, hali shijoat va gʻayratda menman degan yoshlarni yenga olguday.

... Sheʼriyat va adabiyotga boʻlgan qiziqish yoshim yetmasa ham meni oʻquvchilar orasida oʻtkaziladigan anʼanaviy "Fanlar olimpiadasi”ga yetakladi. Xonimjon opani birinchi marta olimpiadada monolog oʻqiyotganida koʻrganman. Uning  shirali ovozi oʻtirganlarni mahliyo qilib qoʻyganligi, rolga kira olishi meni hayratga solgan. Keyinchalik "Amudaryo haqiqati” gazetasi adabiy xodimi va muharriri boʻlgan opadan adabiy maslahatlar olib turgan boʻlsam, 1991-yilda tumanda "Adolat” deb nomlangan xotin-qizlarni ijtimoiy qoʻllab-quvvatlovchi tashkilot rahbari qilib tayinlangan opa bilan tumanimizning turli joylarida har xil soha xodimlari bilan uchrashuvlar tashkil qilib, turli tomoshalar, kontsertlar uyushtirardik. Opa uchrashuvlarni tez-tez tashkil qilar, transport, mablagʻ masalalarini ham darrov  hal qilar, qilayotgan ishiga hech kim haq toʻlamasa ham hech ogʻrinmas, shogirdlarini ham shunga oʻrgatar edi. U kishi  tuman hokimi oʻrinbosarligiga tayinlangach,  turli soha vakillari boʻlgan ayol-qizlarni atrofiga toʻpladilar. Opa bilan respublika miqyosida oʻtkazilgan juda koʻp tadbirlarda qatnashganmiz. U kishi muomala madaniyatining yuksakligi, soʻzga ustaligi va chechanligi, odamlar qalbiga oson yoʻl topa olishlari bilan har qanday davraga fayz bagʻishlar va jon kirita olardilar. Opani Qoraqalpogʻistonda tanimaydigan odam yoʻq, desam aslo mubolagʻa boʻlmaydi. Rahbar xodimlardan tortib sanʼatkor-u, soʻz ustalari, oddiy uy bekasigacha - keng jamoat ahli uni "opa” deb siylashadi, hurmat va ehtirom bilan el oldidagi xizmatlarini eʼtirof etishadi.

Xonimjon opada manmanlik, oʻzini boshqalardan ustun qoʻyish, kibru havo aslo boʻlgan emas, u oddiy kishilar bilan ham ularni oldindan biladiganday tillashib, ularga el boʻlib ketaveradi. Kezi kelganda oʻz soʻzini oʻtkir va keskin qilib ayta oladigan rahbar qirralarini ham namoyon qila oladi. Bugun u ham davlat ishini, ham oilani birday uddalay bilgan ulugʻ ayoldir.

Turmush oʻrtogʻi Safarboy aka bilan el xizmatiga yaray oladigan yigitlar, qayn elidan olqish va duolar olayotgan latofatli qizlarni kamolga yetkazishdi. Bugun ularga "Pir-u badavlat” degan nom yarashadi. Ularni qutlugʻ 60 yoshlari bilan samimiy qutlar ekanman, 100 yoshda ham bugungiday gulgun va navqiron boʻlib qolishlarini, shogirdlar qalbida va el ardogʻida boʻlishini tilab qolaman.

Sanobar XOʻJAMURODOVA,

40-sonli maktab direktori.