Konstitutsiya kuni munosabati bilan maʼnaviyat darslari oʻtkazildi

Umumtaʼlim maktablarida oʻquvchilarning maʼnaviyatini yuksaltirish, ongu-tafakkurini boyitish, dunyoqarashini kengaytirish uchun muntazam ravishda turli mavzularda maʼnaviyat darslari oʻtkazilib boriladi.
Konstitutsiyamizning 27 yilligi munosabati bilan 36-sonli maktabda ham navbatdagi maʼnaviyat darslari tashkillashtirildi. Unda Bosh qomusimiz va qonunlarning mazmun-mohiyatini oʻquvchilar ongiga singdirish, ularning huquqiy savodxonligi, madaniyatini oshirish maqsadlari koʻzlandi.

Maktabning boshlangʻich sinf oʻqituvchisi Saragul Yusupova ham oʻzi dars berayotgan 2-“B”sinfda maʼnaviyat darsini oʻtkazdi. Darsni oʻquvchilar Oʻzbekiston Respublikasi Davlat Madhiyasi bilan boshlashdi.   Shundan soʻng, Saragul Yusupova oʻquvchilarni yurtimiz taraqqiyoti, tinch va farovon kunlarimiz poydevori boʻlgan asosiy qonunimiz – Konstitutsiyamiz qabul qilinganligining 27 yilligi bilan qizgʻin qutladi. Bosh Qomusimiz  –  bu istiqlol va mustaqil Oʻzbekiston ramzi, gʻurur-iftixori, shu zaminda istiqomat qilayotgan, millati, dini, irqi va tilidan qatʼiy nazar, barcha uchun mustahkam himoya, fuqarolik jamiyati istiqbolini belgilab beruvchi dasturilamal hujjat ekanligini keng tushuntirdi. Shuningdek, oʻquvchilarga yaqin kunlar ichida boʻlib oʻtadigan muhim ijtimoiy-siyosiy jarayon – saylovlar, partiyalar, koʻrsatilayotgan nomzodlar, fuqarolarning huquq va burchlari xususida ham maʼlumot berib oʻtdi. Dars davomida oʻquvchilar Vatan haqida maqollar,  sheʼrlar aytib berdilar.

Konstitutsiya kuni munosabati bilan oʻtkazilgan maʼnaviyat darsi oʻquvchilarga juda manzur boʻldi.

Nigora Bozorboyeva, 36-sonli maktab yoshlar yetakchisi.