SAVOL BORMI? JAVOB BERAMIZ!

Savol bormi? Javob beramiz!

1-savol: - Buvimning merosini nomimga oʻtkazmoqchi edim. Oʻlim holati qayd etilmay qolgan ekan. Muddati oʻtgan oʻlim holati qanday tartibda qayd etiladi?

Javob: — Oʻlimni qayd etish marhumning doimiy yashash yoki vaqtincha turgan joyi, oʻlim sodir boʻlgan joydagi FHDYo organi tomonidan amalga oshiriladi.

Oʻlimni qayd etish toʻgʻrisidagi ariza oʻlim toʻgʻrisidagi tibbiy guvohnoma berilgandan keyin 3 kundan kechikmay berilishi kerak.

Oʻlimni qayd ettirish toʻgʻrisida marhumning qarindoshlari va yaqin kishilari, shuningdek, tibbiy muassasa maʼmuriyati murojaat etishlari mumkin, ular oʻlim toʻgʻrisida tibbiy guvohnomani va marhumning shaxsini tasdiqlovchi hujjatlarni taqdim etadilar.

Oʻlim haqidagi tibbiy guvohnoma berilgan vaqtdan boshlab, uch kundan keyin, biroq bir yilgacha boʻlgan muddatda murojaat etilganida, oʻlim marhumning oxirgi yashash joyi yoki oʻlim sodir boʻlgan joydagi FHDYo organi tomonidan, bir yildan keyin murojaat etilganida esa marhumning oxirgi yashash joyidagi FHDYo organi tomonidan qayd etiladi.

2-savol: — Farzandlikka olishni rasmiylashtirishda FHDYo organiga qanday hujjatlar taqdim etiladi?

Javob: — Oila Kodeksining 151-moddasida belgilanganidek, farzandlikka olishga faqat voyaga yetmagan bolalarga nisbatan va faqat ularning manfaatlarini koʻzlab yoʻl qoʻyiladi.

Farzandlikka olish bolani farzandlikka olishni istagan shaxslarning (shaxsning) arizasiga koʻra, vasiylik va homiylik organlarining farzandlikka olishning asosliligi va farzandlikka olinayotgan bola manfaatlariga toʻgʻri kelishi haqidagi xulosasi hisobga olingan holda sud tomonidan amalga oshiriladi.

Farzandlikka olish haqida oʻzgartirishlar kiritish sudning hal qiluv qarori asosida tugʻilganlik haqidagi dalolatnoma yozuvini qayd etgan FHDYo organida, farzandlikka olingan bolaning tugʻilgan joyi oʻzgartirilganda esa — farzandlikka oluvchilar doimiy yashaydigan yoki vaqtincha turadigan joydagi FHDYo organi tomonidan amalga oshiriladi.

FHDYo organiga koʻrsatib oʻtilgan muddat tugagandan keyin murojaat qilingan taqdirda sud qarorida ushbu qaror oʻz kuchini yoʻqotmaganligi haqida yozuv boʻlishi kerak.

Savollarga tuman FHDYo boʻlimi inspektori M.Eshmuradova javob berdi.