BOLAJONLARNING SEVIMLI BOFChA OPASI

Insonning yuragida tugʻilgan havas unda cheksiz ishtiyoq uygʻotadi. Havas va ishtiyoq esa qalbni ruhlantirib turguvchi orzuga aylanadi. Ana shu orzu insonni irodali, kuchli boʻlishga, oldiga qoʻygan ezgu maqsadi yoʻlida  intilib yashashga oʻrgatadi. Orzuga yetishish uchun oʻqib-oʻrganish, izlanish unga kuch bagʻishlaydi.

Maftunkor va goʻzal tabiati, biri-biridan fidoyi va mehnatkash insonlari bilan mashhur Qilichboy zaminida tugʻilib-oʻsgan Feruzaxon Oʻrozmetova onasi – qishloqdagi 42-sonli maktabgacha taʼlim tashkilotida tarbiyachi boʻlib ishlovchi Gulandon opaning kasbiga havas  qilib, “katta boʻlsam, bogʻcha opa boʻlaman”, deganida uning oʻzi MTT tarbiyalanuvchisi edi. Bolalikdagi ana shu havas Feruzaxon ulgʻaygan sari uning qalbida bu kasbga nisbatan mehr va ishtiyoq uygʻotdi. Onasining har bir harakati, bolajonlar bilan oʻtkazadigan mashgʻulotlarini xotira koʻzgusida jonlantirib, xayolan “tarbiyachilik” qilib yurib, umumtaʼlim maktabidan soʻng, 2013-yilda Qilichboy kasb-hunar kollejining maktabgacha taʼlim guruhida tahsil oldi.

Oʻzining intiluvchanligi, tashabbuskorligi, yangiliklarga qiziquvchanligi bilan tengdoshlaridan ajralib turadigan Feruza Oʻrozmetova kollejda oʻqish jarayonida nafaqat oʻzi tanlagan yoʻnalishi boʻyicha, balki  turli fanlardan toʻgaraklar mashgʻulotlarida ham faol ishtirok etdi. Kollejlararo va tuman miqyosidagi koʻrik-tanlovlar, sheʼriyat kechalari, mushoiralarning doimiy ishtirokchisi va sovrindorlari safidan joy oldi. 42-MTTda ish faoliyatini boshlagach, uning maktabgacha taʼlim muassasalari tarbiyachilari oʻrtasida oʻtkaziladigan koʻrik-tanlovlardagi muvaffaqiyatli ishtiroki nafaqat 42-sonli MTT rahbariyati va kasbdoshlari, balki ota-onasi va doʻstlariga ham cheksiz quvonch bagʻishladi.

Feruzaxon oʻz ustida tinimsiz ishlashi, bola psixologiyasini chuqur oʻrgangani bois, har bir mashgʻulotni nazariya va hayot bilan uygʻun ravishda olib boradi. Natija esa hamisha  kutilganidan ziyoda boʻladi. Uning guruhidagi eng injiq bola ham juda qisqa fursatda tinch, muloyim, tarbiyali boʻlib qoladi. Buning uchun Feruza tinimsiz mehnat qilishdan, injiq bola bilan shugʻullanishdan aslo charchamaydi.

Shuning uchun ham unga koʻpchilik ota-onalar: “hali oʻzing qiz bolasan, bolalar koʻnglini tushunishda eng mehribon onadan qolishmaysan”, deyishadi minnatdorlik bilan.

– Bu Feruzaxonning oʻz kasbiga mehri balandligidan, – deydi 42-sonli MTT mudirasi G.Qurbonboyeva. – Ana shu mehri tufayli Feruzaxon “Yil tarbiyachisi” koʻrik-tanlovining tuman bosqi-chida gʻoliblikni qoʻlga kiritdi. Biz bundan juda faxrlanamiz.

Kasbiga va bolajonlarga mehri baland Feruzaxon Oʻrozmetova ish jarayonida oʻz sohasiga oid uslubiy qoʻllanmalardan unumli foydalanish bilan birga tinimsiz ijod qiladi, sheʼrlar, bolalarbop hayotiy ertaklar yozadi. Yozganlarini jamlasa, bir kitob boʻlgulik. Uning sheʼrlarini bolajonlar sevib yodlashadi. Yaxshilik, ezgulik, rostgoʻylik, mardlik va vatanparvarlik mavzularidagi ertaklari esa bolajonlarga olam-olam zavq, taassurot bagʻishlaydi.

– Prezidentimiz: “Kelajak – bogʻchadan boshlanadi”, deb bekorga aytmaganlar, – deydi Feruza Oʻrozmetova. – Biz tarbiyachilar shuning uchun ham kelajakka masʼulmiz. Ana shu masʼullik tuygʻusi meni hamisha oldinga intilib yashashga  undayveradi.

Feruzaxon ayni paytda “Yil tarbiyachisi” koʻrik-tanlovining Qoraqalpogʻiston Respublikasi bosqichiga qizgʻin hozirlik koʻrmoqda. Biz yosh va iqtidorli tarbiyachi, bolajonlarning sevimli bogʻcha opasi Feruzaxon Oʻrozmetovaga yangi-yangi yutuqlar tilaymiz.

Robiya YOʻLDOShEVA.

Kasbim – faxrim

Kasbim mening – faxrimdir,

Hayot yoʻlim – ahdimdir.

Ish kunim shod kutaman,

Bundan quvnab ketaman.

Farzand guldir odamga,

Ziynat erur olamga.

Maʼyus koʻrsak gar uni,

Bedor kutamiz tongni.

Garchi men qiz bolaman,

Bolajon, deb yonaman.

Issigʻi-sovugʻiga,

Qarayman har yogʻiga.

Mehrim hadya etaman,

Sogʻiniblar kutaman.

“Bogʻcha opa”, desalar,

Boshim osmon – yuksalar.

Feruza Oʻrozmetova.