HUQUQBUZARLAR QARShISIGA TOʻPLANGAN ISh MAHALLADA, OChIQ SAYYoR SUD MAJLISIDA MUHOKAMA ETILDI

Joriy yilning 19-avgust sanasida Jinoyat ishlari boʻyicha Amudaryo tuman sudining raisi Jasur Urazboyev, sudya yordamchisi Elyor Jumaniyozov, Ichki ishlar boʻlimining huquqbuzarliklar profilaktikasi boʻlinmasi bosh inspektori Orifjon Qosimov ishtirokida Mangʻit shahridagi Durunki mahallasi fuqarolar yigʻini maʼmuriy binosida, ochiq sayyor sud majlisi boʻlib oʻtdi. Unda Oʻzbekiston Respublikasi Maʼmuriy javobgarlik toʻgʻrisidagi Kodeksining 183-moddasida koʻrsatilgan mayda bezorilik, yaʼni jamoat joylarida uyatli soʻzlar bilan soʻkinish, fuqarolarga haqoratomuz shilqimlik qilish hamda jamoat tartibini va fuqarolarning osoyishtaligini buzish kabi boshqa xatti-harakatlarda ifodalangan jamiyatda yurish-turish qoidalarini qasddan mensimaslik tarzidagi xuquqbuzarlikni sodir etgan ikki nafar huquqbuzar fuqaro qarshisiga toʻplangan maʼmuriy ish hujjatlari ayblanuvchilarning vakillari, jabrlanuvchilar va ularning vakillari, ish boʻyicha guvohlar va huquqbuzarlarning mahalladoshlari ishtirokida atroflicha muhokama etildi.
Boʻlib oʻtgan sayyor sud majlisida huquqbuzarlikni sodir etgan fuqarolar Oʻzbekiston Respublikasi Maʼmuriy javobgarlik toʻgʻrisidagi Kodeksining tegishli moddalari asosida maʼmuriy javobgar deb topilib, ularga nisbatan 15 sutka maʼmuriy qamoq jazosi tayinlandi. Har ikkala huquqbuzar ham mahallada bezorilik qilib, fuqarolar tinchligini buzgani, qilgan ishlaridan pushaymon ekanliklarini bildirishib, bundan keyin mahallada, jamoat orasida yurish-turish qoidalariga amal qilishga soʻz berdilar.
Shuningdek, Qoraqalpogʻiston Respublikasi Sanitariya-epidemiologik osoyishtalik va jamoat salomatligi boshqarmasi, Amudaryo tumani Sanitariya-epidemiologik osoyishtalik va jamoat salomatligi boʻlimi tomonidan oʻtkazilgan nazorat tadbirlari jarayonida tumandagi dorixonalardan birida savdo qilayotgan tadbirkorlar oʻz savdo shoxobchasida Oʻzbekiston Respublikasi Maʼmuriy javobgarlik toʻgʻrisidagi Kodeksining 53-moddasida nazarda tutilgan Sanitariya qonun hujjatlarini, sanitariya normalarini, qoidalarini va gigiyena meʼyorlarini buzib, xuquqbuzarlik sodir etganligi boʻyicha toʻplangan ish materiallari ham ochiq sayyor sud majlisida koʻrib chiqildi va xuquqbuzarlarga nisbatan qonuniy choralar koʻrildi.
Undan tashqari, shu kuni mahalla faollari ishtirokida yana toʻrtta maʼmuriy huquqbuzarlikka oid ish materiallari ham sayyor sud tomonidan koʻrib chiqilib, qonuniy yechim qabul qilindi.
Shu kuni Durunki mahallasi fuqarolar yigʻinining maʼmuriy binosida mahalla faollari va keng jamoatchilik ishtirokida Oʻzbekiston Respublikasi Prezidenti saylovini oʻtkazish tartibi hamda saylov qonunchiligi yuzasidan Jinoyat ishlari boʻyicha Amudaryo tuman sudining raisi Jasur Urazboyev tomonidan tushuntirish-targʻibot ishlari ham olib borildi. Mahalla faollari bilan ochiq muloqot tarzida oʻtkazilgan mazkur tadbirda ishtirokchilar joriy yilning 24-oktyabr sanasida boʻlib oʻtadigan Oʻzbekiston Respublikasi Prezidenti saylovlari va Oʻzbekistondagi Saylov qonunchiligiga oid savollar bilan murojaat qildilar. Oʻz navbatida Jasur Urazbayev fuqarolarni qiziqtirgan barcha savollarga atroflicha javob berdi.
Boʻlib oʻtgan sayyor sud majlisi va Jinoyat ishlari boʻyicha Amudaryo tuman sudi raisi Jasur Urazbayev tomonidan mahalla faollari ishtirokida oʻtkazilgan Oʻzbekiston Respublikasi Prezidenti saylovi hamda saylov qonunchiligiga oid ochiq muloqot tarzidagi targʻibot tadbiri fuqarolarning huquqiy madaniyatini, savodxonligini oshirish, oʻz fikrlarini emin-erkin ifoda etishlari hamda sudlarning ochiqligini  taʼminlashga qaratilgani bilan muhim ahamiyatga ega boʻldi.

Robiya YOʻLDOShEVA.