TUMANDAGI «MADAD» HUQUQIY MASLAHAT BYuROSI SAMARALI FAOLIYaT YuRITMOQDA

Mamlakatmizda aholining huquqiy ongi va huquqiy madaniyatini yuksaltirishga, jamiyatda fuqarolarning huquqiy savodxonlik darajasini oshirishga, aholiga bepul yuridik yordam koʻrsatish tizimini yanada takomillashtirishga alohida eʼtibor qaratib kelinmoqda.

2019-yil 6-sentyabr sanasida qabul qilingan Oʻzbekiston Respublikasi Vazirlar Mahkamasining «Aholiga huquqiy axborotni yetkazish va yuridik yordam koʻrsatish tizimini yanada takomillashtirish chora-tadbirlari toʻgʻrisida»gi qarori bu boradagi ishlar samaradorligini oshirishda muhim dasturulamal boʻlmoqda.

Ushbu qarorga muvofiq hududlarda, «Madad» - muassasa shaklidagi nodavlat notijorat tashkiloti Amudaryo tumanidagi huquqiy maslahat byurosi tashkil etilgan edi.

Hozirgi kunda tuman Davlat xizmatlari markazi binosida faoliyat yuritayotgan mazkur byuro tomonidan qator samarali ishlar qilinmoqda. Xususan, byuro mutaxassislari aholiga bepul huquqiy maslahat hamda amaliy huquqiy yordam koʻrsatib kelinmoqda. Fuqarolarga bevosita hamda onlayn rejimda bepul huquqiy maslahat berilib, birlamchi yuridik yordam koʻrsatilmoqda. Qolaversa, tashkil etilayotgan samarali ishlar natijasida aholining huquqiy ongi va huquqiy madaniyatini yuksaltirishga koʻmaklashilmoqda.

«Madad» - muassasa shaklidagi nodavlat notijorat tashkiloti Amudaryo tumanidagi huquqiy maslahat byurosi bosh mutaxassisi Nilufar Jumaniyazova tomonidan har kuni kamida 10-15 nafar fuqarolarga turli masalalar yuzasidan huquqiy maslahat va tushuntirishlar beriladi. Jumladan, fuqarolar tomonidan mehnat munosabatlari, pensiya va ijtimoiy himoya, oilaviy masalalar, sud-huquq sohasiga oid, uy-joy masalalariga taalluqli boʻlgan huquqiy maslahat hamda tushuntirishlar berilmoqda.

Alohida takidlash kerakki, aholi tomonidan bepul yuridik yordam olishni yanada qulaylashtirish maqsadida ilgʻor xorij tajribasidan foydalangan holda maxsus yaratilgan huquqiy axborot portali imkoniyatlaridan ham samarali foydalanilmoqda.

Fuqarolar huquqiy masalalarga oid savollar boʻlsa, «Madad» nodavlat notijorat tashkilotining Huquqiy maslahat byurolari hududiy byurolariga murojaat qilishlari mumkin. Qolaversa, aholida onlayn tarzda bepul huquqiy maslahat olish imkoniyati ham mavjud. Fuqarolar  maxsus sayt orqali savollarini yoʻllashlari hamda barcha savollarga huquqshunos javobini olishlari mumkin.

Qayd etish joizki, “Madad” muassasining samarali faoliyati natijasida aholiga bepul yuridik yordam koʻrsatishning innovatsion tizimi yaratilmoqda, murojaatlarni koʻrib chiqish bilan bogʻliq xarajatlarning qisqarishiga yordam berilmoqda, fuqarolarning hamda davlat organlari va tashkilotlari xodimlarining vaqti tejalmoqda.

Tuman hokimligining Axborot xizmati.