ChEGARAChI BOʻLISh HAM BAXT

Oʻzbekiston Respublikasining davlat suverenitetini va hududiy yaxlitligini, aholining tinch hayoti va xavfsizligini himoya qilishga safarbar etilgan Qurolli Kuchlarimiz safida xizmat qilish – mening bolalikdan orzuim edi. Bu orzu ulgʻayganim sari qatʼiy maqsadga aylandi.
2007-yilda maktabni tamomlab, Toshkent viloyati Qibray tumanidagi kasb-hunar kollejida kinologiya yoʻnalishida oʻqidim. Kollejni tugatgach, 2009-yilda harbiy xizmatga chaqirildim. Muddatli harbiy xizmat burchimni oʻtab boʻlgach, Davlat xavfsizlik xizmatiga qarashli chegara  qoʻshinlarida shartnoma asosida xizmat qilib kelmoqdaman.
Har yili mehnat taʼtili  olib tugʻilgan makonim – Surxondaryo viloyatining Denov tumaniga, oilam bagʻriga qaytishim yaqinlarim uchun haqiqiy bayram tusini oladi. Bir yillik sogʻinch, hayotimdagi oʻzgarishlar haqidagi suhbatlar, diydor quvonchi bilan taʼtil oxirlaganini sezmay qolaman. Biroq hayotimda harbiy xizmat sohasini tanlaganimdan hech oʻkinmayman.
Oʻzbekiston Respublikasi oʻz xavfsizligini  taʼminlash uchun yetarli darajada harbiy salohiyatga ega. Bu biz harbiy xizmatchilarga ulkan faxr-iftixor bagʻishlaydi. Chunki aziz yurtimizda umrguzaronlik qiluvchi xalqlarning tinchligi, osoyishtaligidan ulkan baxt yoʻq. Milliy Armiyamiz osudalik va obodlikning mustahkam qalqonidir.
Biz chegara qoʻshinlari harbiy xizmatchilarining zimmamizga chegaralarimiz daxlsizligini saqlashdan tashqari, chegaraoldi hududlarida tinchlikni saqlash, aholi, xususan, yoshlarga  Oʻzbekiston Respublikasining “Davlat chegarasi toʻgʻrisida”gi Qonuni mazmun-mohiyatini keng tushuntirish vazifasi ham yuklatilgan. Shu maqsadda chegaraoldi hududida istiqomat qiluvchi aholi bilan tez-tez suhbatlar oʻtkazib turamiz. Shuningdek, yoshlarga tezkor va harakatchan, tashkiliy jihatdan mukammal, zamonaviy qurol-yaroq va texnikaga ega boʻlgan Milliy Armiyamiz safida xizmat qilish – har bir yigitning sharafli burchi ekanligini singdirish, Milliy Armiyamizga nisbatan koʻngillarida hurmat hissini tarbiyalash maqsadida “Vatan aziz – jasorat mangu!” shiori ostida maktablarda davra suhbatlari oʻtkazmoqdamiz.
Yaqinda harbiy qismimizda chegara hududlaridagi maktablar yuqori  sinf oʻquvchilari uchun “Ochiq eshiklar” kunini  oʻtkazdik. Tadbirda  oʻquvchilarga chegarachilarning mashaqqatli va sharafli xizmat faoliyati, shuningdek, qurol-aslahalarning, xizmat itlarining davlatimiz sarhadlarini qoʻriqlashdagi roli haqida keng tushunchalar berdik.
Toʻgʻri, xizmatim masʼuliyatli. Lekin shu sohani tanlaganimdan juda faxrlanaman, chegarachi boʻlish, yurtimiz sarhadlarini sergak turib qoʻriqlash ham baxt.

Otabek MAHMUDOV,
DXX chegara qoʻshinlari xizmatchisi, 1-darajali serjant.