HUQUQBUZARLIK VA JINOYaTChILIKNING OLDINI OLISh MASALALARIGA BAGʻIShLANGAN YIGʻILISh OʻTKAZILDI

Huquq-tartibot organlari xodimlari ishtirokida jamoat tartibini saqlash, jinoyatchilikka qarshi kurashish, maʼmuriy huquqbuzarlik va jinoyatchilikning oldini olish, fuqarolar xavfsizligini taʼminlash masalalariga bagʻishlangan yigʻilish boʻlib oʻtdi.

Amudaryo tumani Ichki ishlar boʻlimi binosida oʻtkazilgan mazkur yigʻilishda Qoraqalpogʻiston Respublikasi Qoʻriqlash boshqarmasi masʼullari Imomaddin Allashov, Azamat Sidullayev, tuman Ichki ishlar boʻlimining Yoʻl patrul xizmati xodimi Usmon Rajabov, tuman Favqulodda vaziyatlar boʻlimi inspektori Bekzod Allaberganov hamda tuman Qoʻriqlash boʻlimi shaxsiy tarkibi ishtirok etdi.

Yigʻilishda dastlab huquqbuzarlik va jinoyatlarning barvaqt oldini olish, sodir boʻlgan jinoyatlarni issiq izida fosh etish, jamoat tartibi, fuqarolar xavfsizligi hamda yoʻl harakati xavfsizligini taʼminlash borasida amalga oshirilgan ishlar, yoʻl qoʻyilgan kamchiliklar borasida soʻz yuritildi.

Shundan soʻng, har bir ichki ishlar organi xodimining oʻzi xizmat intizomi va qonunchilikka qatʼiy amal qilishi, xizmat vazifasiga vijdonan yondashishi, asosiysi vatanga, xizmatga va xalqiga sadoqatli boʻlishi lozimligi tushuntirilib, 2022-yilda tumanda huquq-tartibot organlari tomonidan amalga oshirilishi rejalashtirilgan ishlar muhokama qilindi va har bir yoʻnalish boʻyicha barcha ustuvor vazifalar belgilab olindi.

Soha xodimlariga berilgan vazifa va topshiriqlarni vijdonan bajarish, fuqarolar xavfsizligi, jinoyatchilik va huquqbuzarliklarni barvaqt oldini olishda tezkorlik bilan ish tashkil etish boʻyicha tavsiyalar berildi.

Shuningdek, tartib-intizom, odob-axloq, muomala madaniyati, shaxsiy va xizmat avtotransport vositalarini boshqarishda yoʻl harakati qoidalariga rioya qilish kerakligi, qish mavsumida fuqarolarga tabiiy gaz, isitish moslamalardan foydalanishda eʼtiborli, ehtiyotkor boʻlishni, is gazidan zaharlanishdan saqlanishni muntazam ravishda tushuntirish boʻyicha targʻibot-tashviqot tadbirlarini oʻtkazish kerakligi aytib oʻtildi.

Yigʻilish soʻngida xizmat faoliyati davomida Vatanimiz tinchligi va el-yurt osoyishtaligini taʼminlash yoʻlidagi fidokorona xizmatlari, jinoyatchilikka qarshi kurash borasida mardlik va jasorat namunalarini koʻrsatib, hamkasblariga oʻrnak boʻlib xizmat qilib kelayotgan tuman Qoʻriqlash boʻlimi xodimi safdor Muzaffar Toʻliboyev Oʻzbekiston Respublikasi Qurolli kuchlari tashkil topganining 30 yilligi munosabati bilan Prezident Shavkat Mirziyoyev tomonidan taʼsis etilgan esdalik koʻkrak nishoni bilan taqdirlandi.

Shu qatori yigʻilishda jamoat tartibini saqlash, fuqarolar xavfsizligini taʼminlash, huquqbuzarlik va jinoyatchilikning oldini olish borasida xizmatga vijdonan yondashib ishlab kelayotgan boshqa xodimlarga ham minnatdorchilik bildirilib oʻtildi.

B.Atadjanov, tuman Qoʻriqlash boʻlimi boshligʻi.