OTABEK – TUMANIMIZ YoShLARINING FAXRI VA IFTIXORI

Mamlakatimizda yoshlar uchun yaratilayotgan sharoit va imkoniyatlar koʻlami bugun juda keng. Bundan foydalanib kamolga yetayotgan, mustaqil fikrlaydigan, zamonaviy ilm-fan va kasb-hunarlarni puxta egallagan, oʻz yurti va xalqiga fidoyi, ajdodlarimiz boshlab bergan ishni davom ettirishga qodir boʻlgan, har tomonlama sogʻlom va barkamol avlodni aslo yengib boʻlmaydi. Oʻz maqsadlariga yetishda dadil va doim yangilik sari intiluvchi yoshlar elimizning faxri va gʻururidir.

Amudaryo tumanida ham yuksak choʻqqilarni zabt etayotgan,  oʻz  ustida tinim bilmasdan ishlayotgan, oʻz oilasi va Vatani oldidagi burchini chin yurakdan his qilib, taʼlim olayotgan yoshlar bisyor. Ana shunday ilgʻor fikrli, dunyoqarashi keng, maʼnaviyatli, mard va jasur oʻgʻlonlardan biri Otabek Rahimboyevni yurt taraqqiyoti uchun intilayotgan yoshlardan, desak aslo adashmagan boʻlamiz.

Otabek Rahimboyev  Amudaryo tumanining Yuqori qishloq mahallasida, ziyoli oilada tugʻilib, voyaga yetdi. Onasi Zulfiya Yodgorova geografiya fani oʻqituvchisi. Ham oilada, ham maktabdagi yuksak maʼnaviy muhit ostida katta boʻlgan Otabek ham  ota-onasining sohasini tanladi.

2017-yilda Berdaq nomidagi Qoraqalpoq davlat universitetining geografiya va tabiiy resurslar fakulteti gidrometeorologiya taʼlim yoʻnalishi talabasi boʻldi. Talabalik davridanoq ustozlar eʼtirofiga sazovor boʻlib, 50 dan ortiq tanlov, konferentsiya va  olimpiadalar  gʻolibiga aylandi.

Izlanuvchan va bilimga chanqoq Otabek 2020-yil 26-avgust kuni  Prezidentimiz tomonidan taʼsis etilgan “Mard oʻgʻlon” davlat mukofoti bilan taqdirlandi. Ushbu mukofotga sazovor boʻlish hammaga ham nasib qilavermaydi. Ular orasida Otabekning ham borligi bizga oʻzgacha gʻurur va iftixor bagʻishlaydi.

Joriy yil 10-yanvar kuni Otabek muhandislik geologiyasi fanidan Butunrossiya talabalar va magistrantlar oʻrtasida oʻtkazilgan onlayn olimpiadada qatnashib, faxrli birinchi oʻrinni egalladi.

Yurtimizda yoshlarning bilim olishlari, kasb-hunar egallashlari uchun barcha shart-sharoit va imkoniyatlar yaratilgan. Yoshlardan esa faqatgina yaratilgan imkoniyatlardan foydalanish talab qilinadi, xolos.

Hozirgi kunda Otabek Islom Karimov nomidagi Toshkent davlat texnika universiteti Geologiya-qidiruv va kon metallurgiya fakulteti gidrogeologiya va muhandislik geologiyasi va geofizikasi kafedrasi 1-bosqich magistranti. Ilmiy salohiyati va erishgan yutuqlari tufayli  magistraturaga imtiyozli ravishda qabul qilingan.

U hozirda ilmiy rahbari Mirabbos Zokirov rahbarligida “Orolboʻyi hududlarining antropogen omillar taʼsiri ostida muhandislik geologik sharoitlarning oʻzgarishini oʻrganish” mavzusida ilmiy tadqiqot ishlarini olib bormoqda.

Tumanimizning intiluvchan, bilimga chanqoq, izlanuvchan oʻgʻloniga kelgusi oʻqish va ishlarida muvaffaqiyatlar tilab, bundanda baland marralarni zabt etishiga umid qilib qolamiz.

F.Eshimbetova.