MATBUOT – MENI SEHRLAGAN OLAM

Bolaligimdan oʻqituvchilikdan boshqa yana bir kasb, yana bir olam meni oʻziga maftun etib kelgan. Yuragimda tugʻilgan hislarni qogʻozga toʻkarkanman, hamisha koʻnglim shu olamga maftun boʻlaverardi.

Xayolimda qayerlarga bormasdim. Telejurnalist boʻlib sayohatlar qilardim, dunyo boʻylab. Odamlarga yaxshi xabarlar yetkazish, yangiliklar bilan tanishtirish jon-u dilim edi. Brigadamizdagi dalada ochilgan birinchi gʻoʻza guli haqidagi maqolam hamqishloqlarim uchun katta sovgʻa boʻlgandi. Hammaning quvonganini koʻrib, eʼtiborda ekanligimdan juda-juda xursand boʻlganman. Yillar oʻtib, oʻqituvchilik sohasida faoliyat yuritsam-da, men uchun tumanda bitta qadrdon bino, bolaligimdan meni rom etgan soha, jonkuyar va qalbi begʻubor insonlarni jamlagan aziz maskan bor.
Bu – "Taraqqiyot koʻzgusi" gazetasi tahririyati binosi. Bu binoga har gal kirib borganimda u yerdagilar meni qanday kutib olar ekan, degan andishaga bormaganman. Sababi bu maskanda meni hamisha kulib turgan chehralar, iliq munosabat, sogʻinchli diydor qarshi olgan. Muhit doʻstona, munosabatlar samimiy, yordam begʻaraz, fikrlar xolis. Izlagan, istagan narsamni topadigan oshyonim.
27-iyun – Matbuot va OAV xodimlari kuni munosabati bilan tahririyat xodimlarini chin qalbimdan tabriklayman. Oygul Rajabova, Robiya Yoʻldosheva, Gʻulomjon Yeshniyozov, Saʼdulla Xoʻjaniyozov, Ollambergan Jumaniyozov, Muyassarxon, Mahmudjon, Ravshanbeklar mening yaqin insonlarimga aylangan. Mashaqqatli kasblarining guvohi boʻla turib ham baribir bu sohani juda qadrlayman. Yoshligimdan ijod qilishimda qoʻl-qanot boʻlgan insonlarim oldida bir umr taʼzimdaman. Oygul Rajabova va Robiya Yoʻldoshevalarning mehr toʻla nigohlari, kuyunchaklik bilan aytgan oʻgitlari har doim qulogʻimda.
Garchand yoshi mendan kichik boʻlsa ham salobatli va vazmin Gʻulomjonning ish faoliyatiga, koʻrsatgan ehtiromiga tasanno deyman.
Aziz insonlarim! Matbuot xodimlari! Kasbingizdan kamol topib, el xizmatidan charchamang. Bayramingiz muborak boʻlsin!

Guloyim BEGJANOVA.