Jayxun ilhomlari

Navroʻz sayli

Bahor yangilanish, bu gullar fasli,

Bahorga oshufta bulbullar fasli,

Pinhona sevishgan, koʻngillar fasli,

Tabiat inʼomi, zamon zayli bu,

Oʻynab-kuling doʻstlar, Navroʻz sayli bu.

 

Boychechak beribdi bahordan darak,

Maysalar yam-yashil, inson jonsarak,

Hatto uygʻonishda, osmon-u falak.

Tabiat inʼomi, zamon zayli bu,

Oʻynab-kuling doʻstlar, Navroʻz sayli bu.

 

Koʻk libos kiyibdi, toʻrtta tomoning,

Doshqozonda qaynar Navroʻz taoming.

Kuy-qoʻshiq avjida, bahor ayyoming,

Tabiat inʼomi, zamon zayli bu,

Oʻynab-kuling doʻstlar, Navroʻz sayli bu.

 

Insonga eʼtibor, sifatli taʼlim,

Yil boshida boʻldi, barchaga maʼlum.

Navroʻz shoh taomi – sumalak, halim,

Tabiat inʼomi, zamon zayli bu,

Oʻynab-kuling doʻstlar, Navroʻz sayli bu.

 

Shomurod urf-odat, oʻzimizniki,

Kelajak - shul qaro koʻzimizniki.

Hammasi oʻgʻil-u qizimizniki,

Tabiat inʼomi, zamon zayli bu,

Oʻynab-kuling doʻstlar, Navroʻz sayli bu.

Shomurod Xoʻjanov, Doʻrman ovuli.

 

Doshqozonda sumalak

Ayni bahor chogʻida,

Goʻzal Mangʻit bogʻida,

Navroʻzi olam boʻldi,

Dillar quvonchga toʻldi.

Doshqozonda sumalak,

Qaynar limmo-lim malak,

Qushlar karvoni lak-lak,

Aytishar yaxshi tilak.

Momolardan allalar,

Aytishni xoʻp oʻrgandik.

Gul ochilgan pallalar,

Olam nurga toʻlgandek.

Har yili shunday Navroʻz,

Kirib kelsin shoʻx boʻlib.

Amudaryo suvlari,

Oqib tursin moʻl boʻlib.

Sayyora Nasrullayeva, 24-sonli maktab oʻqituvchisi.

 

Samodagi varrak

Navroʻz keldi qaranglar,

Kuy-qoʻshiqlar jaranglar.

Karnay, surnay ovozi,

Dillarga xush yoqadi.

 

Doshqozonda sumalak,

Toshlar terib solishar.

Olam toʻladi nurga,

Inson qalbi mehrga.

 

Samo toʻlar varakka,

Yuzdan kulgu arimas.

Navroʻz shunday ajoyib,

Koʻngillarda gʻaroyib.

Gulzor Qoʻziboyeva,

34-maktab oʻquvchisi.

 

Koʻklam keldi

Bahor keldi, bahorjon,

Sayroqi qushlar bilan.

Qozonlarda qaynagan,

Sumalak va koʻk bilan.

 

Yomgʻir yogʻdi dalaga,

Qirlar toʻldi lolaga.

Varraklar parvozidan,

Shodlandi qiz-u bola.

Hayotxon Hayitboyeva,

34-maktab  oʻquvchisi.

 

Gulbahor nafasi

Quyosh erta uygʻonib,

Koʻklamning yuzin ochdi.

Har tomonda qushlar ham

Chugʻurlab, shodon uchdi.

 

Navbahor osmonida,

Bulutlar ham quvlashdi.

Orasida varraklar

Bulutlarga boʻylashdi.

 

Shunday goʻzal damlarda

Sumalaklar qaynadi.

Atrofida bolalar,

Quvlashmachoq oʻynadi.

 

Qizaloqlar gul terib,

Shoʻx qoʻshiqlar kuylashar.

Sochlarin mayda oʻrib,

Quvlashmachoq oʻynashar.

 

Atrofning goʻzalligi,

Qushlarning xush ovozi.

Dillarga xoʻp yoqadi.

Gulbahorning nafasi.

Elyorbek Erkinov, 57-maktab  oʻquvchisi.

 

Boychechak

Dimogʻim toʻlmoqda xushboʻy hidlarga,

Burkanar yon-atrof yashil ranglarga.

Qanchalar nimjon, nozik, bir nihol,

Hayot uchun kurashar bu jajji qirol.

 

Nimalarga qodir sirli tabiat,

Yorib chiqar toshni, shu nimjon nihol.

Quyoshning nuridan kuch olar sekin,

Olamni bezatar, lola-yu hilol.

 

Quloqqa chalinar qushlar sayrogʻi,

Boshqacha nur sochar quyosh, bahorgi.

Qaldirgʻoch unutmas, eski makonin,

Eshigim ochiqdir, barakam, kirgin.

 

Tirik jon tebranar, bahorni sezib,

Bolari gʻuvillar, bogʻlarni kezib.

Kumush qish chekinadi sekinlik bilan,

Ona yer toʻyindi, qor-mehring bilan.

 

Togʻlarning qoʻynida ungan boychechak,

Qizlarning boshida goʻzal moychechak.

Mayin shabadangdan yayradim, bahor,

Jajji bola boʻldim, qaytadan, takror.

Mansurbek OLLOMBERGANOV,

Islom Karimov nomidagi

TDTU talabasi.

 

Vatan

Osmondagi yulduzlar,

Hech ham soʻnib qolmaydi.

Oy va Quyosh kun almashib,

Sira tinim bilmaydi.

 

Insonlar bu hayotda,

Vatanim deb yashaydi.

Oy-yulduzlar porlagan,

Quyoshli osmon kabi.

Zarina Toʻraboyeva,

34-maktab oʻquvchisi.

 

Kapalak

Uchib kelib, kapalak,

Bahordan berdi darak.

Quvlashmachoq oʻynadik,

Kun boʻyi boʻlib halak.

 

Bahor nafasi yelib.

Olam munavvar boʻldi.

Jajji kapalak kelib,

Dillar sevinchga toʻldi.

 

Mayli, oʻynab uchaver,

Gullarimni quchaver.

Sen bahorning elchisi,

Dillarni shod etaver.

 Kumushoy Toʻraboyeva,

29-maktab oʻquvchisi.