EL RIZQI – DEHQON MEHNATIDAN

Xalqimiz rizqi moʻlligi, dasturxonimiz toʻkinligi va el-yurt farovonligi eng avvalo, zahmatkash dehqonlarimiz mehnatidan. Shu boisdan keyingi yillarda ekin maydonlarining unumdorligini oshirishga, sara urugʻlardan moʻl hosil olishga, dehqonchilikka ilgʻor texnologiyalarni joriy etishga alohida eʼtibor qaratilayotir. Bu boradagi dunyoning ilgʻor davlatlari bilan oʻzaro hamkorlik mustahkamlanayapti.

Xalqimizda dehqonchilik azaldan ulugʻlanib kelingan, moʻʼtabar kasb sifatida qaralgan.

Amudaryo tumanining Xitoy ovulida ham dehqonchilik tufayli oilasini obod, turmushini farovon etibgina qolmay, yurtdoshlarimiz dasturxoniga turli noz-neʼmatlarni, taʼmi totli mevalarni tortiq qilayotganlar koʻp.

Ozod aka Berdiboyev ovuldagi 2-sonli maktabda qirq yil oʻquvchilarga jismoniy tarbiya fanidan taʼlim-tarbiya berdi. U yoshlarning ham maʼnan, ham jismonan sogʻlom boʻlib kamol topishlari uchun oʻz hissasini qoʻshgan elda eʼzozli inson.

Tajribali murabbiy nafaqaga chiqqandan keyin “dam olaman, boʻldi endi, ishlamayman” deb bekor oʻtirmadi. Hovlisi atrofidagi 16 sotix tomorqa yerida erta bahordan to kech kuzgacha tinimsiz mehnat qilib, oilasi ehtiyoji uchun zarur boʻladigan sabzavot, poliz ekinlarini oʻzi yetishtirdi, roʻzgʻoridan ortganini bozorga olib chiqib sotib, moʻl daromad topa boshladi.

Uning tomorqasida kartoshka, piyoz, pomidor, bodring, karamdan tortib sarimsoq piyozgacha ekiladi. Hozirgi paytda pomidor, bodring, bulgʻor qalampiri, oʻrta sabzi, oʻrta karamlari juda xaridorgir boʻlayotir. Bogʻidagi 20 tup olmalar mevasining koʻpligidan shoxlarini egib turibdi. Bundan tashqari bogʻda 50 tup olcha, 5 tup gilos, 20 tup oʻrik, olxoʻri, nok, shaftoli daraxtlari bor. Tomorqachi mevali daraxtlardan ham har yili yaxshi daromad koʻradi. Hovlisi atrofini oʻrab turgan uzumzor koʻrgan kishining havasini keltiradi. Uzumning ham bir nechta navlarini ekib, sohaga doir ilmiy adabiyotlarni oʻqib, elda tanilgan bogʻbonlar bilan hamsuhbat boʻlib, bu borada yaxshigina tajriba toʻplagan sobiq muallimdan bugungi kunda bogʻbonlik sirlarini oʻrganayotganlar ham, uning mevali daraxtlarni payvandlash usullariga qiziqayotganlar ham koʻp.

Xalqimizda “er yigitga qirq hunar oz” degan ibora bor. Buning maʼnosi juda teran ekanligini koʻpincha oʻylamaymiz ham. Lekin hayotda shunday odamlar borki, ularning intilishlari, qiziqishlari va shu tufayli erishayotgan yutuqlari barchaga ibrat boʻlgulik. Buni qahramonimiz faoliyatida ham koʻrishimiz mumkin. Gap shundaki, u oʻz hovlisi atrofida asalarichilikni ham yoʻlga qoʻydi. Dastlab ikki-uchta asalari oilasi parvarish qilingan xonadonda hozirgi kunda 14 ta oila boqilayapti. Natijada dehqonchilikdan keladigan daromadga yana bir qoʻshimcha manba yaratildi.

Ozod aka Berdiboyev chorvachilik , parrandachilik yoʻnalishlari bilan ham shugʻullanib keladi. Ahli ayoli , farzandlari , nevaralari bilan birgalikda ikkita sogʻin sigir, ikkita zotdor buqalarni, ellikdan ziyod parrandalarni parvarish qilayapti.

Qahramonimiz turmush oʻrtogʻi bilan ikki oʻgʻil, ikki qizni halol mehnatlari bilan voyaga yetkazishdi, hammasini uyli-joyli qilishdi. Ular ham Ozod akadek asosiy ishidan soʻng tomorqachilik bilan shugʻullanadi.

U kishi bilan muloqotimiz davomida qoʻl telefoni tez-tez jiringlab, suhbatimizni boʻlib turdi. Kimdir koʻchat soʻraydi, yana kimdir maslahat soʻrab qoʻngʻiroq qiladi.

– Barchasiga qoʻlimdan kelganicha yordam qilaman, – deydi qahramonimiz.

El rizqi dehqon mehnatidan yaraladi. Ozod aka Berdiboyev va oila aʼzolari yurtdoshlarimiz dasturxoni toʻkin boʻlishiga hissa qoʻshayotganidan mamnun.

Biz ularga mehnatlaringizning barakasini bersin, deb qolamiz.

Sevara ISMOILOVA