“ONA TILIM JARANGI OLAM UZRA TARALGAY” MAVZUSIDAGI TADBIR OʻTKAZILDI

Til – millatning yuzi, or-nomusi, shaʼni va iftixori. Vatanga muhabbat – ona tiliga muhabbatning timsoli, xalq va millatga buyuk ehtiromning ifodasidir. Ona tilini sevgan, uning qadr-u qimmatini hamisha baland tutgan millatning kelajak ufqlari yorqindir.

Asrlar davomida kamsitilgan, turli davrlar silsilasida qadri toptalgan oʻzbek tili oʻzining buyukligini, hech qachon sinmasligini maʼnaviy-maʼrifiy jihatdan barkamolligini saqlab qolgan goʻzal va jarangdor til – millonlab insonlar uchun aloqa vositasi sifatida dunyo miqyosida oʻz nufuziga ega. Buni muhtaram Prezidentimizning xalqaro miqyosdagi anjumanlar minbaridan oʻzbek zabonida nutq soʻzlaganlaridan, Prezidentimizning global muammolarni hal qilish borasidagi taklif va tashabbuslarini jahonning yetakchi siyosatdonlariga oʻz ona tilida ifoda etganlaridan ayonki, ona tilimizning nufuzi yil sayin oshib bormoqda. Bugungi kunda 50 mln.dan ziyod insonlar oʻzbek tilida soʻzlashadilar. Rossiya, Yaponiya, Janubiy Korea, AQSh, Germaniya, Hindiston, Bangladesh kabi mamlakatlar xalqlari orasida oʻzbek tilini oʻz ona tillari kabi mukammal oʻrganayotgan yoshlar bilan birgalikda keksa avlod vakillarining ham borligi biz oʻzbek xalqi qalbiga cheksiz iftixor baxsh etadi.

Oʻzbek tiliga davlat tili maqomi berilgan qutlugʻ sana – 21-oktyabr mamlakatimizdagina emas, jahonning turli hududlarida tilimizga, xalqimizga hurmat va ehtirom ifodasi sifatida har yili keng nishonlanadi. Ayniqsa, ona Oʻzbekistonimizning har bir shahar-u qishlogʻida, taʼlim-tarbiya muassasalari, davlat tashkilotlarida, mahallalarda, hatto oilalarda ham ona tili bayrami munosabati bilan kitobxonlik, sheʼrxonlik kechalari, bilimdonlar bahslari, tilimiz tarixiga oid davra suhbatlari anʼanaviy tarzda tashkil etiladi.

Ana shunday tadbirlardan biri 16-sonli umumtaʼlim maktabida ham oʻtkazildi. “Ona tilim jarangi olam uzra taralgay!” mavzusidagi maʼnaviy-maʼrifiy, adabiy-musiqiy tadbirda maktabning 6-, 7-, 8-sinflar oʻquvchilari, maktab oʻqituvchilari ishtirok etishdi.

Oʻquvchilar tomonidan tayyorlangan koʻrgazmali vositalar, oʻzbek tili tarixiga oid adabiyotlar, mumtoz va hozirgi zamon oʻzbek adabiyoti namoyondalarining asarlari, ona tilining taraqqiyot bosqichlari boʻyicha maʼlumotlar asosida tayyorlangan albomlar, gullar bilan bezatilgan sahna ishtirokchilarning chiqishlari bilan tadbirga yanada fayz, joziba bagʻishladi.

Ayniqsa, oʻzbekcha Assalomu alaykum degan ulugʻ kalom bilan boshlangan tadbirda oʻquvchilar muomala madaniyati, soʻzlarni toʻgʻri talaffuz qilish, yondosh tillardan oʻzlashgan soʻz va iboralarning tilimiz taraqqiyotidagi oʻrni, ularni toʻgʻri qoʻllash toʻgʻrisida bir-birlari bilan fikr almashdilar.

Shundan soʻng, oʻquvchilar oʻzbek xalq ashulalarining ohanglariga mos oʻzlari tayyorlagan raqslarni mahorat bilan ijro etishdi. Oʻzbekiston xalq artisti Ozodbek Nazarbekov ijrosidagi “Doirangni chal”, “Xafa boʻlaman” ashulalariga joʻr boʻlib kuyladilar va ashulalar mazmunini oʻzlari ijro etgan raqslar harakatlari orqali ifoda etib berdilar. Bu bilan oʻquvchi-yoshlar ona tilimizning dilrabo raqslar jilosidagi betakror maʼnolarini oʻz harakatlari orqali koʻrsatib, ona tilimizning kuy va navolarga singib ketgan buyuk sehrini mohirlik bilan namoyish etishdi.

Tadbir davomida oʻquvchilar maktabning ona tili va adabiyot fani oʻqituvchilari bilan birgalikda buyuk allomalar tomonidan ona tilimiz haqida bildirilgan hikmatlar xazinasi aro goʻyo sayohat qildilar, biri-biridan goʻzal va ibratli hikmatlar xususida fikrlashdilar.

Tadbirning adabiy qismi yanada qiziqarli taassurotlarga boy boʻldi. Unda oʻquvchilar Oʻzbekiston xalq yozuvchisi Oʻtkir Hoshimovning “Dunyoning ishlari” asaridagi “Qarz” hikoyasi asosida tayyorlangan sahna koʻrinishini mahorat bilan ijro etdilar.

Ona tilimizning asrlar osha toptalgani, ming xil chigʻiriqlardan mayib-majruh holda oʻtib, yana qaddini tutgani va Ona tilimizning qadr-qimmatini oshirib yashash har birimizning muqaddas burchimiz ekanligi xususidagi Oʻzbekiston xalq shoiri Muhammad Yusufning “Kechir meni ona tilim” sheʼrini oʻquvchilar jam boʻlishib ifodali oʻqib berganlarida qalblar junbushga keldi va tomoshabinlar ham ona tilimizga boʻlgan yuksak mehr va muhabbatini olqishlar orqali namoyon qildilar.

“Ona tilim jarangi olam uzra taralgay!” mavzusidagi bayram tadbiri har bir qalbda ona tilimizga cheksiz mehr-muhabbat, joʻshqinlik va iftixor tuygʻularini yanada mustahkamladi.

Robiya YOʻLDOShEVA