ShAROFIDDIN BOLTABOYeV AMUDARYoLIKLAR FAXRI
Sharofiddin Boltaboyev nomini eshitganda tumanimizdagi har bir amudaryolik qalbida oʻzgacha bir faxr, havas uygʻonadi. Amudaryolik sportchi Sharofiddin Boltaboyevning dzyudo sporti boʻyicha dunyodagi nufuzli musobaqalarda erishayotgan yutuqlari, qoʻlga kiritgan sovrinlari sportchilarimizni yanada ruhlantirib, olgʻa intilishlariga turtki boʻlmoqda, desak aslo mubolagʻa boʻlmaydi.
Sharofiddinning sportga boʻlgan qiziqishi bolalik chogʻlaridan juda yuqori boʻlgan. U tumandagi 1-sonli umumtaʼlim maktabida taʼlim olayotgan kezlaridanoq Bolalar-oʻsmirlar sport maktabida sportning dzyudo turi bilan shugʻullana boshlagan. Maktabni tamomlagach, Chirchiq Olimpiya zahiralari kollejida taʼlimni davom ettirib, 2014-yilda kollejni tugatgan. Shu davrga qadar yosh chempion dzyudo sport turi boʻyicha qatnashgan musobaqalarida erishgan natijalariga koʻra 81 kilogrgamm vazn toifasida dunyo reytingida 4881 ball bilan 7-oʻrinda turadi.
Taʼkidlash kerakki, Sharofiddin Boltaboyev koʻpgina xalqaro turnirlarda, Osiyo va jahon chempionatlarida faxrli oʻrinlarni egallab, yurtimiz bayrogʻini koʻklarga koʻtarib kelmoqda. Ayniqsa, soʻnggi ikki yilda qoʻlga kiritgan yutuqlari faxrlanishga arziydi. Jumladan, Oʻzbekiston dzyu-do terma jamoasi aʼzosi Sharofiddin 2019-yil Toshkentda boʻlib oʻtgan “TASHKENT GRAND PRIX – 2019” xalqaro musobaqasida 81 kilogramm vazn toifasida ishtirok etdi. Ilk – saralash bosqichida raqibini atigi 2-soniyada magʻlub qilib, faxrli birinchi oʻrinni egalladi hamda dzyudo boʻyicha xalqaro grand-pri rekordini yangiladi.
Shuningdek, amudaryolik yosh chempion 2020-yilda Frantsiya poytaxti Parij shahrida «Katta Dubulgʻa» turkumiga kiruvchi nufuzli turnirda ishtirok etib, murosasiz bahslarda faxrli 2-oʻrinni egalladi hamda kumush medallari sonini yana bittaga koʻpaytirdi.
Chempion yurtdoshimizning 2021-yil 18-fevralda Isroil poytaxti Tel-Avivda dzyudo boʻyicha «Katta Dubulgʻa» turnirida ishtirok etib, qoʻlga kiritgan gʻalabasi Tokio Olimpiadasi uchun navbatdagi 1000 ochkoni olib keldi. Qolaversa, Sharofiddin Boltaboyev 2021-yil 5-mart sanasida Toshkentda oʻtkazilgan «Katta Dubulgʻa» musobaqasining kumush medaliga ham sazovor boʻldi va qimmatli 700 reyting ochkosini qoʻlga kiritdi.
Yurtdoshimiz, dzyudo chempioni Sh.Boltaboyevning mislsiz gʻalabalari bilan doim faxrlanamiz.
Charos Arslonova.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
