ELIMIZNING PIR-U BADAVLAT ONAXONLARI EʼZOZLANDI

Amudaryo tumanida Vazirlar Mahkamasining “Keksa avlod vakillarining jamiyatdagi oʻrni va ijtimoiy faolligini yanada oshirish chora-tadbirlari toʻgʻrisida”gi Qarori ijrosini taʼminlash maqsadida “Keksalarni eʼzozlash, ularga hurmat-ehtirom” gʻoyasi ostida 4-10-oktyabr kunlari “Keksalar haftaligi” oʻtkazildi.

Haftalik doirasida tumanda istiqomat qilayotgan nuroniylarning holidan xabar olish, ularni maʼnaviy va jismoniy qoʻllab-quvvatlash, hurmat-ehtirom koʻrsatish va eʼzozlash boʻyicha qator tadbirlar oʻtkazildi.

Jumladan, haftalik doirasida Toʻlqin ovul fuqarolar yigʻinining yangi binosi ochilish marosimi oʻtkazilib, ovul hududida istiqomat qiluvchi ikkinchi jahon urushi  front ortida mehnat qilgan nuroniylar holidan xabar olinib, “Bir piyola choy ustida dilkash suhbatlar” tadbiri tashkil etildi. Shuningdek, Qilichboy  mavzesidagi Xizr eli mahallasida, Qipchoq ovul fuqarolar yigʻinida va tumanimizning koʻplab ovul va mahalla fuqarolar yigʻinlarida “Diydor shirin” mavzusida adabiy-musiqiy va maʼrifiy tadbirlar tashkil etilib, nuroniylar bilan fayzli dasturxon atrofida davra suhbatlari boʻlib oʻtdi.

Haftalik doirasida Ajiniyoz nomidagi Nukus davlat pedagogika instituti qoshidagi Iqtidorli bolalar maktabida keksalar oʻrtasida turli sport musobaqalari, xususan, shaxmat-shashka, stol tennisi musobaqalari, “Keksalarni eʼzozlash, ularga hurmat-ehtirom koʻrsatish – xalqimizga xos ezgu fazilat”  gʻoyasini oʻzida mujassam etgan “Yangi Oʻzbekistonni barpo etishda nuroniylarning oʻrni” shiori ostida maʼnaviy-maʼrifiy tadbirlar oʻtkazilib, tumanimiz mahallalarida yashovchi 90 va 100 yoshdan oshgan, ikkinchi jahon urushi fronti orqasida mehnat qilgan nuroniylar bilan suhbatlar uyushtirildi.

Tumandagi Choykoʻl hamda Xizr eli mahallalarida istiqomat qiluvchi 100 yoshdan oshgan momolar holidan xabar olindi, ularga sovgʻa-salomlar berish bilan birga salomatligi koʻzdan kechirilib, tibbiy koʻrikdan oʻtkazildi.

Choykoʻl ovulidagi Xadicha momo Bekanova oʻtgan asrning 1915-yilida tavallud topganlar. Hayotining asosiy qismini qishloq xoʻjaligi sohasiga bagʻishlangan momo sobiq ittifoq davrida kolxozlashtirish yillarining faqat qoʻl mehnati bilan bajariladigan barcha yumushlarida jasorat va matonat bilan mehnat qildi. Ariq-zovurlarni qazish, paxtani qoʻlda ekish, qoʻsh haydash kabi ogʻir qoʻl mehnatlarida toblangan momo bugungi kunda nevara-chevaralari, el-yurt ardogʻida. Prezident Farmoni bilan 2020-yilda “Shuhrat” medali bilan taqdirlangan Xadicha momo Bekanova 106 yoshni qarshilamoqda.

Xizr eli mahallasida istiqomat qiluvchi, pir-u badavlat onaxon Parda momo Bekniyozova ham ikki asr yuzini koʻrgan nuroniy onaxonlardan 106 yoshga toʻlgan Parda momo Bekniyozova hamon bardam va tetik.

Tuman Mahalla va oilani qoʻllab-quvvatlash boʻlimi xodimlari “Keksalar haftaligi” doirasida “Elimizning pir-u badavlatlari” shiori ostida Choykoʻl  ovuli va Xizr eli mahallalarida  boʻlishib, Xadicha momo va Pardaxon momolar holidan xabar olishdi.

Koʻpni koʻrgan, pir-u badavlat onaxonlar bilan dildan, samimiy suhbat qurishib, ularning ibratli umr hikoyalaridan bahramand boʻlishdi hamda onaxonlarga sovgʻalar hadya etishdi. Shu bilan birga nuroniy onaxonlarni tibbiy koʻrikdan oʻtkazishdi.

Robiya YOʻLDOShEVA.