2021-yil sarhisobi: Qurilish va muhandislik-kommunikatsiyalari

Amudaryo tumani hududida 2021-yilda barcha manbalar hisobidan 112 ta obʼektda loyiha qiymati 87 mlrd. 576,5 mln. soʻmlik qurilish-taʼmirlash ishlari olib borilishi rejalashtirilgan boʻlib, investitsiya dasturi doirasida 35-sonli maktab binosini hamda 21-sonli MTT binosini rekonstruktsiya qilish ishlari pudratchi tashkilotlar tomonidan yuz foiz bajarildi.

NRS-35 suv inshootini hamda 7,9 km. uzunlikdagi ichimlik suvi tarmoqlarini rekonstruktsiya qilish boʻyicha loyiha qiymati 3 mlrd. 556 mln.  soʻm boʻlgan qurilish-taʼmirlash ishlari bajarilib, 7,9 km. ichimlik suvi tarmogʻi tortildi.

Aholini uy-joy bilan taʼminlash boʻyicha Gulzor mahallasi hududida qiymati 27 mlrd. 415 mln.  soʻmlik jami 5 ta 5 qavatli, har biri 30 xonadonli, 150 ta xonadonga moʻljallangan uy-joylar qurish rejalashtirilgan boʻlib, bugungi kunda qurilish ishlari davom etmoqda.

Mahallalardagi jami 6 ta ijtimoiy soha obʼektlarida 10 458,4 mln. soʻmlik qurilish-taʼmirlash ishlarini amalga oshirish rejalashtirilgan. Jumladan, 43-sonli maktab binosini, 72-sonli maktab filiali binosini, 85-sonli maktab binosini kapital taʼmirlash hamda 45-sonli MTT binosini mukammal taʼmirlash ishlari pudratchi tashkilotlar tomonidan toʻliq bajarildi, 63-sonli maktab binosini rekonstruktsiya qilish boʻyicha 3 mlrd. 203,6 mln. soʻmlik ishlar bajarildi va 2-sonli maktab binosida 3 mlrd. 438,7 mln. soʻmlik rekonstruktsiya ishlari amalga oshirildi.

Shuningdek, Gulzor mahallasi hududida loyiha qiymati 4 mlrd. 502,6 mln. soʻmlik ATB Mikrokreditbank tuman filiali maʼmuriy binosi qurilishi pudratchi tashkilot tomonidan yuz foiz bajarildi.

 “Orolboʻyi mintaqasini rivojlantirish jamgʻarmasi” mablagʻlari hisobidan loyiha qiymati 428,1 mln. soʻmlik Gulzor mahallasi, N.Rahimov nomli koʻchadagi 1-, 2-uylar, Yangiobod mahallasi, Navbahor koʻchasi 1-uylarning tom qismi mukammal taʼmirlandi.

Amir Temur nomli ovuli hududida qiymati 5 mlrd. 311,3 mln. soʻmlik 14,5 km. uzunlikdagi suv tarmoqlari hamda 1 ta suv tozalash inshooti  va Yuqori qishloq mahallasi hududida loyiha qiymati 413,1 mln. soʻmlik 1 ta suv tozalash inshooti qurilishi pudratchi tashkilot “Mangʻit servis” MChJ tomonidan nihoyasiga yetkazilmoqda.

Beruniy nomli, Olmazor va Gulzor mahallalari hududlarida 9 km. uzunlikdagi, Barkamol avlod va Humoyun nomli koʻchalarni obodonlashtirish, tungi yoritish chiroqlarini oʻrnatish, piyodalar va velosiped yoʻlaklarini qurish boʻyicha loyiha qiymati 7 mlrd. 111,3 mln. soʻmlik qurilish ishlari rejalashtirilgan boʻlib, bugungi kunda pudratchi tashkilot tomonidan qurilish-taʼmirlash ishlari davom ettirilmoqda.

Joriy 2021-yilda 35 dona transformator  punktlari, 129 km. uzunlikdagi havo tarmoqlari taʼmirlandi, 11 ta transformator punktlari yangidan oʻrnatildi va 23 km. uzunlikdagi havo tarmoqlari yangidan tortildi.

Tuman Gaz taʼminoti filiali tomonidan gaz xoʻjaligini 2021-2022-yil kuz-qish mavsumiga tayyorlash maqsadida 230 dona gaz taqsimlash qurilmalari taftish qilindi. 1 dona gaz taqsimlash qurilmasi mukammal taʼmirlandi. 35 km. uzunlikdagi gaz quvurlarida bosim ostida zichlikka sinash ishlari olib borilib, 15,8 km. uzunlikdagi yer osti gaz quvurlarining holati pribor usuli bilan tekshiruvdan oʻtkazildi va 5,2 km. uzunlikdagi gaz quvurlarini boʻyoqlash ishlari amalga oshirildi.

Bundan tashqari, 3538 ta xonadonga yangi elektron gaz hisoblagich oʻrnatildi.

2021-yil 9-dekabr holatiga 3674,68 tonna suyultirilgan gaz olib kelinib, aholiga tarqatildi.

Joriy yilning shu kunigacha 894 dona gaz ballonlar koʻrikdan oʻtkazilib, tuman aholisiga yetkazib berildi.