Mahallalardagi xotin-qizlar faollarining ish faoliyatini samarali tashkil etishga bagʻishlangan seminar boʻlib oʻtdi

Prezidentimizning joriy yil 1-martdagi “Oila va xotin-qizlar davlat qoʻmitasi faoliyatini tashkil etish toʻgʻrisida”gi qarori bilan Xotin-qizlarning jamiyatdagi rolini oshirish, gender tenglik va oila masalalari boʻyicha Respublika komissiyasi tashkil etildi.

Qarorga koʻra, mahallalardagi xotin-qizlar faollari lavozimlariga nomzodlar ochiq tanlovlar asosida ishga qabul qilindi. Bugun Amudaryo tumanida mavjud 49 ta ovul va mahalla fuqarolar yigʻinlarining har biriga mahalladagi xotin-qizlar faoli tayinlangan.

Nomzodlar mahalladoshlari orasida hurmat-eʼtiborga ega, har jihatdan ayol-qizlarga namuna boʻla oladigan salohiyatli kadrlar orasidan tanlab olingan. Yangidan joriy qilingan tizim asosida oʻz faoliyatini boshlagan ayol-qizlar oldida bugun gʻoyat masʼuliyatli vazifalar turibdi.

25-aprel kuni xotin-qizlar faollari faoliyatini samarali tashkil etish hamda zaruriy bilim va koʻnikmalarini shakllantirish maqsadida Nukus davlat pedagogika instituti huzuridagi aniq fanlarga ixtisoslashtirilgan Amudaryo tumani iqtidorli bolalar maktabi binosida 2 kunlik oʻquv-seminarlar tashkil qilindi.

Seminarda tuman hokimi Sultonboy Yoʻldashev, hokim oʻrinbosari, Oila va xotin-qizlarni qoʻllab-quvvatlash boʻlimi boshligʻi Goʻzal Saburova va boshqalar soʻzga chiqib, ayol-qizlarga yaratilayotgan imkoniyat va shart-sharoitlar haqida toʻxtalib, xotin-qizlar faollariga ish faoliyatlarida muvafaqqiyatlar tiladi.

Shundan soʻng trener Gulzira Prniyazova tomonidan xotin-qizlarni qoʻllab-quvvatlash boʻyicha qabul qilingan qaror va farmonlarning mazmun-mohiyati batafsil tushintirildi. Shuningdek, xodimlarning ish faoliyatini samarali tarzda tashkil etishlari boʻyicha muhim koʻrsatmalar berilib, eʼtibor qaratishlari lozim boʻlgan jihatlar, oldinda turgan  muhim vazifalar, yordamga muhtoj ayol-qizlarning muammolarini tizimli hal etish boʻyicha tushuntirish va tavsiyalar berildi.

Shu oʻrinda taʼkidlash joizki, mahallalarda “xonadonbay” va “fuqarobay” ishlash samaradorligini oshirish boʻyicha amalga oshirilayotgan islohatlar alohida eʼtirofga loyiq. Cababi, mahallalarda yangidan joriy qilingin hokim yordamchilari − kambagʻallikni qisqartirish va yangi ish oʻrinlari yaratishga, yoshlar yetakchisi − yoshlar siyosati va yoshlar balansiga, xotin-qizlar faoli esa − ayollar masalasi va ularning dardu-tashvishi bilan ishlashga javob beradi.

Mahallalarda yaratilgan ushbu yaxlit tizim orqali har bir fuqaroning muammolari tizimli ravishda hal etiladi.

Bugun ayol-qizlarga boʻlgan eʼtibor va gʻamxoʻrlik har qachongidan ham oshgan. Sababi, Vatan taqdirini belgilovchi yosh avlodning har tomonlama barkamol shaxs boʻlib voyaga yetishlari aynan oiladagi muhitga va oqila ayol-qizlarimizga bogʻliq.

Xotin-qizlarimizning hamda butun xalqimizning ishonchli vakillari sifatida oʻz faoliyatini boshlayotgan mahallalardagi xotin-qizlar faollarining kelgusidagi ish faoliyatlarida muvaffaqiyat tilaymiz!

Tuman hokimligining Axborot xizmati